Шимолий Корея етакчиси Ким Чен Ин Корея халқ армиясига асос солинган (25 апрель) кун шарафига бўлиб ўтган ҳарбий парадда сўзга чиқиб, КХДР ўзининг ядровий кучларини имкон қадар тез фурсатда мустаҳкамлашда давом этади, деди.

Шимолий Корея Марказий телеграф агентлигининг ёзишича, давлат раҳбари “Биз ядро кучларимизни янада ривожлантириш ва кучайтириш учун чоралар кўрамиз, деган.

Унинг таъкидлашича, Шимолий Корея исталган вақтда ядровий хавфни тутиб туришга қаратилган ядро қуролларини ҳаракатга келтиришга тайёр туриши лозим.

Шимолий Корея етакчисининг таъкидлашича, гарчи ядро қуролининг асосий вазифаси "урушларни бартараф қилиш бўлсада", лекин у фақат шу билан чекланиб қолмайди.

Жанубий Корея оммавий ахборот воситаларининг ёзишича, Пхеньян парадга тахминан 20 минг аскар ва техникаларини сафарбар қилган. Парадда турли ҳарбий техникалар қатори яқинда синовдан ўтган гипертовушли "Хвасон-8" ракетаси ҳамда сувости кемасидан учириладиган баллистик ракеталар ҳам бўлган.