Шимолий Кореяда COVID-19 туфайли 18 мингдан зиёд киши касалхонага ётқизилган, уларнинг олти нафари вафот этди, деб хабар бермоқда Рёнхап агентлиги Шимолий Кореянинг давлатга қарашли оммавий ахборот воситаларига таяниб.

Бир кун аввал Шимолий Корея етакчиси Ким Чен Ин коронавирус туфайли мамлакатда  фавқулодда вазият юзага келгани ҳақида баёнот берган эди. Ким Чен Ин ҳукуматга касалликнинг тарқалишини тўхтатиш учун барча чорани кўришга буйруқ берди.

Хусусан, мамлакат шаҳарлари ва уездларига кириш-чиқиш йўллари ёпилган.

8 майда Пхенянда бемордан олинган таҳлиллар натижаси мамлакатда «омикрон» штамми тарқалганини кўрсатган эди. Ўшанда мамлакат раҳбарияти «энг юқори фавқулодда вазият» учун қўлланиладиган вирусни назорат қилиш тизими жорий этилганини эълон қилганди.