70 дан ортиқ давлатдан ҳунармандлар, амалий санъат усталари, мутахассислар, соҳа олимлари ва фахрий меҳмонлар иштирок этиши кутилаётган фестивални юқори савияда ташкил этиш учун барча чора-тадбирлар кўрилмоқда.

Кўча ва хиёбонларни ободонлаштириш, қўшимча ёритиш чироқлари ўрнатиш, гуллар экиш, безатиш, кўп қаватли уйлар фасадини таъмирлаш, конференция ўтказиш зали, овқатланиш шохобчаларини тайёрлаш ишлари якунига етди. Айни кунларда 76 километрлик автомобиль йўлида қуриш, жорий таъмирлаш ишлари амалга оширилмоқда. Асосий тадбирлар ўтказиладиган “Худоёрхон ўрдаси” майдонида саҳна ва амфитеатр ўрнатилмоқда. Фестиваль иштирокчилари учун янгидан қурилаётган меҳмонхоналарнинг 4 таси битказилди, яна 4 тасида қурилиш ишлари давом этмоқда. Қўшимча 102 та уй-меҳмонхоналари шай ҳолатга келтирилмоқда.