Пойтахтимиздаги "Халқлар дўстлиги" санъат саройида пенчак силат бўйича халқаро фестиваль ўтказилди.

Ўзбекистон Республикаси Жисмоний тарбия ва спорт вазирлиги, мамлакатимиз пенчак силат федерацияси ва қатор давлат ва жамоат ташкилотлари билан ҳамкорликда ташкил этилган фестивалда Марказий Осиё давлатлари, Индонезия, Малайзия ва Россиядан келган пенчак силат усталари ҳамда санъаткорлар иштирок этди.

Халқаро фестивалнинг тантанали очилишида мамлакатимизда спортни ривожлантириш, ўсиб келаётган ёш авлодни ҳар томонлама баркамол инсонлар қилиб вояга етказишда спортнинг ўрни беқиёслиги ва спорт орқали ёшларимизни соғлом бўлиб камол топишлари учун барча имкониятлар яратилаётганлиги ҳақида тўхталиб ўтилди. Бунинг самарасида юртимизда яккакураш спорт турлари янада ривожланаётганлиги ва бир қатор нуфузли мусобақаларда ўзбек спортчилари шоҳсупага кўтарилаётганлиги ҳақида тўхталиб ўтилди.

Мамлакатимиз спортчилари яккакураш спорт турлари бўйича дунёда етакчилардан. Ёшларимиз бокс, кикбоксинг, каратэ, таэквондо, дзюдо, пенчак силат сингари қатор спорт турлари бўйича жаҳон ва қитъа чемпионатларида, нуфузли халқаро мусобақаларда юқори натижаларга эришиб келмоқда.

Ўзбекистон пенчак силат федерацияси томонидан мазкур халқаро фестивалнинг ташкил этилишидан кўзланган мақсад ёшлар ўртасида соғлом турмуш тарзини кенг тарғиб қилиш, уларни спортнинг яккакураш турларига кенг жалб этиш, спортчиларимизнинг тажриба ва маҳоратини оширишдан иборатдир.

– Юртимизда ташкил этилган нуфузли фестиваль ажойиб ўтди, – дейди мамлакатимиз пенчак силат федерацияси раиси А.Жўрабоев. – Бундай фестиваллар спортчилар ва минглаб ёшларнинг спортга бўлган қизиқишини кучайтиришда муҳим аҳамиятга эга. Бу каби спорт тадбирлари мамлакатимизда мунтазам ташкил этилса, аҳоли ўртасида пенчак силат спорт тури янада оммалашишига ишонаман.