Футбол бўйича 2026 йилги жаҳон чемпионати ўйинларига мезбонлик қиладиган шаҳарлар номи эълон қилинди.

Бу ҳақда Халқаро футбол федерациялари уюшмаси (ФИФА) матбуот хизмати ахборот тарқатди.

Хабарда айтилишича, жаҳон чемпионати илк бор уч давлат - АҚШ, Мексика ва Канадада ўтказилади. 

АҚШ мундиал учун Канзас Сити, Хьюстон, Атланта, Даллас, Сиэтл, Сан-Франциско, Лос-Анжелес, Бостон, Филадельфия, Майами ва Шарқий Рутерфорд шаҳарларини танлади.
Чемпионат иштирокчиларини Мексиканинг Мехико, Монтеррей ва Гвадалахара шаҳарлари ҳам қабул қилади. Канада эса устунликни Ванкувер ва Торонтога берган.

Финал шаҳри кейинроқ маълум қилинади.

Қайд этиш жоиз, 2026 йилги мусобақанинг ҳал қилувчи босқичига биринчи марта 48 жамоа учун йўлланма ажратилади.

Эслатиб ўтамиз, футбол бўйича жаҳон чемпионати мезбонлиги Мексикага 1970 ва 1986 йилларда, Қўшма Штатларга 1994 йили ҳам насиб этган. Миллионлар ўйини улкан байрами Канадага илк бор ташриф буюриши кутилмоқда.

Т. Рўзиев, ЎзА