Футбол бўйича Ўзбекистон Суперлигасига ўтиш ўйинларининг сўнгги баҳсида "Олимпик" ва "Металлург" жамоалари ўзаро куч синашди.

Пойтахтимиздаги “Бунёдкор” стадионида ўтган мазкур учрашувда “Металлург” 2:1 ҳисобида ғалаба қозонди. Ўйинда Бекобод шаҳри жамоасига Суперлига йўлланмасини тақдим этган голларга Забиҳилло Ўринбоев, Шаҳзоджон Неъматжонов муаллифлик қилган бўлса, “Олимпик”нинг ягона голи Риан Исломов томонидан киритилди.  

Шу тариқа, "Металлург" келгуси мавсум ҳам миллий чемпионатимизда иштирок этиш масаласини ҳал қилган бўлса, Денис Коростиченко шогирдлари Про-лигага йўл олди.  

Энди келгуси мавсумда Суперлигада 16 та жамоа – “Андижон”, “Бухоро”, “Бунёдкор”, “Динамо”, “Машъал”, “Металлург”, “Насаф”, “Навбаҳор”, “Нефтчи”, “ОКМК”, “Пахтакор”, “Қизилқум”, “Қўқон-1912”, “Сурхон”, “Сўғдиёна” ва "Шўртан" клублари мамлакат чемпионлиги учун кураш олиб боради.  

Маълумот ўрнида: Жорий йилги мавсумда Қарши шаҳрининг “Насаф” жамоаси 52 очко жамғарган ҳолда Суперлига чемпионига айланди. “Пахтакор” клуби аъзоси Драган Черан эса 13 та гол урган ҳолда тўпурарлар рўйхатида биринчи бўлди.  

Жавоҳир Тошхўжаев,

ЎзА