Хитойлик олимлар инсон организмидаги ёшга оид ўзгаришларни секинлаштириши мумкин бўлган янги препаратни муваффақиятли синовдан ўтказди. Тадқиқот натижалари қаришга қарши курашда бутунлай янги давр бошланишидан дарак беради.

Сенесент ҳужайраларга қарши кураш 

Янги дори иммун тизимини фаоллаштириб, бўлиниш қобилиятини йўқотган, аммо организмда тўпланишда давом этадиган сенесент ҳужайраларни нишонга олади ва йўқ қилади. Тажрибада олимлар қаришга чидамли тарзда генетик модификация қилинган илдиз ҳужайраларини юборишган. Натижада синов иштирокчиларида ёшартирувчи таъсирлар кузатилди. 

Инсон ва ҳайвонларда дастлабки натижалар 

12 ҳафта давом этган дастлабки клиник синовлардан сўнг иштирокчиларнинг мушаклари, ички органлари ва мия фаолияти яхшиланган, тери ва сочларида эса соғлом кўриниш қайд этилган. 

Шунингдек, макака приматларида ҳам сенесcенcе-ресистант прогенитор cеллс (СРCС) деб аталувчи махсус ҳужайралар 44 ҳафта давомида синовдан ўтказилди. Ҳар икки ҳафтада тана вазнига мос дозада юборилган ҳужайралар: қариш белгиларини камайтирган, орган деградациясини секинлаштирган, мия ва мушак фаолиятини яхшилаган. 

Муҳими, тажриба давомида ҳужайралар шикастланмаган, ўсимталар юзага келмаган ва жиддий салбий оқибатлар кузатилмаган.

Параллель изланишлар ва эҳтиёткорлик 

Хитойда ҳужайра терапияларидан ташқари сенолитик дорилар – масалан, Dasatinib ва Quercetin ҳам ўрганилмоқда. Айрим кичик клиник тадқиқотлар уларнинг когнитив ва жисмоний фаолиятни яхшилаши мумкинлигини кўрсатган, аммо мутахассислар буни тасдиқлаш учун ҳали эрта эканини таъкидлашмоқда.

Экспертлар огоҳлантиришича, сенесент ҳужайраларни бутунлай йўқ қилиш ҳам салбий оқибатларга олиб келиши мумкин, чунки улар айрим ҳолларда организмни тикланиш жараёнида муҳим роль ўйнайди. Шу сабабли бундай янги терапиялар кенг кўламли ва узоқ муддатли клиник синовлардан ўтказилиб, хавфсизлиги ҳамда самарадорлиги тўлиқ тасдиқланиши керак. 

<iframe width="640" height="420" src="https://www.youtube.com/embed/tVqKsHcZUeI" title="Keksayishga qarshi kurashda yangi bosqich" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, 

Улуғбек Тўхтаев, ЎзА