Мамлакатимизда инсон қадр-қиммати, айниқса, ногиронлиги бўлган шахслар масалалари доимий диққат-эътиборда бўлиб, уларнинг ҳуқуқ ва манфаатларини ҳимоя қилиш, тўсиқсиз муҳит яратиш, жамиятга интеграция қилиш борасида изчил чора-тадбирлар амалга оширилмоқда. Ногиронлиги бўлган шахслар мамлакатнинг сиёсий, ижтимоий, иқтисодий ҳамда маданий ҳаётида фаол иштирок этиши учун зарур ҳуқуқий, ташкилий шарт-шароитлар яратилмоқда.

Жорий йилда ҳам 9 та тиббий-ижтимоий муассасада 89,1 миллиард сўмлик қуриш ва реконструкция ишларини амалга ошириш режалаштирилган бўлиб,  бугунги кунда 50 миллиард сўмлик ишлар бажарилган.  

Бу ҳақда АОКАда ўтказилган брифингда Тиббий ижтимоий хизматларни ривожлантириш агентлиги директорининг биринчи ўринбосари Баҳодир Каримов маълум қилди.  

– Кейинги 5 йилда республикада кексалар ва ногиронлиги бўлган шахсларни манзилли ижтимоий ҳимоя қилиш борасида амалга оширилган ислоҳотлар аниқ натижаларга олиб келди, – дейди Б.Каримов. – Бу ишлар негизида Юртбошимизнинг кексалар ва ногиронлиги бўлган шахсларнинг тақдири, уларнинг муаммоларига бўлган алоҳида эътибори, меҳри ётади.  

Таъкидланишича, кексалар ва ногиронлиги бўлган шахсларни ҳар йили бепул тиббий-ижтимоий хизматлар билан қамраб олиш кўлами 80 минг нафардан 120 минг нафарга ортди. Ўзгалар парваришига муҳтож 18 минг нафардан зиёд якка ва ёлғиз истиқомат қилувчи кексалар, ногиронлиги бўлган шахслар уйида ижтимоий хизмат кўрсатиш билан қамраб олинди. Ўзгалар парваришига муҳтож 4 минг нафардан зиёд якка кекса ва ногиронлиги бўлган шахсларга бепул тақдим этиладиган асосий озиқ-овқат ва гигиена воситалари сони 15 тадан 19 тага оширилди. Жорий йилнинг июнь ойидан бошлаб, 19 турдаги озиқ-овқат маҳсулотлари ўрнига ҳар ойда ёлғизларнинг пенсиясига 300 минг сўмдан компенсация қўшиб бериш жорий қилинди.   

Шунингдек, ногиронлиги бўлган шахсларга бепул бериладиган протез-ортопедия буюмлари ва реабилитация техник воситаларининг рўйхати 22 турдан 27 тагача кўпайтирилди. Реабилитация техник воситалари ва протез-ортопедия буюмлари билан таъминлаш деярли 2 баробарга кўпайиб, 40 мингдан ортди. Муҳтож фуқароларнинг ўзи танлаган ишлаб чиқарувчидан ушбу маҳсулотларни олишларини таъминловчи тизим жорий қилинди.  

Айни пайтда “Саховат” ва “Мурувват” интернат уйларида давлат таъминотига олинган шахслар сони 14 фоизга ортиб, 9,3 минг нафарни ташкил этдмоқда.  
 
 

М.Қосимова,  
ЎзА