Keksalarni e’zozlash, ularga hurmat-ehtirom ko‘rsatish – xalqimizga xos ezgu fazilat. Shu maqsadda, Sog‘liqni saqlash vazirligi tashabbusi bilan tashkil etilgan va respublika miqyosida 1 avgustdan 1 sentyabrga qadar o‘tkazilishi ko‘zda tutilgan “Keksalar salomatligi oyligi” aksiyasi Xovos tumanida yuksak saviyada tashkil etildi.

34-oilaviy poliklinikada tashkil etilgan tibbiy ko‘rikka “Bunyodkor”, “Istiqlol”, “Do‘stlik”, “Tinchlik” mahallalarida istiqomat qilayotgan keksa avlod vakillari qamrab olindi. Ularning salomatligi tuman va viloyat miqyosidagi davolash profilaktika muassasalarining tor doira mutaxassislari tomonidan o‘rganib chiqilmoqda.  

–Bunday e’tibor va g‘amxo‘rlikdan nafaqat men, barcha keksa avlod vakillari birdek xursandmiz, – deydi, viloyat Kengashi deputati, mehnat faxriysi Jumaboy Suyunov. – Kardiolog, endokrinolog, nevropatolog kabi mutaxassislar ko‘rigidan o‘tdim. Bir ikkita muammoni aytmaganda, deyarli sog‘liq bilan bog‘liq jiddiy muammo kuzatilmadi. “Xonadonbay” tashkil etilgan tibbiy ko‘rik jarayonlarida yolg‘iz, nogironligi bor, uyda yotib qolgan bemorlar salomatligi belgilangan tartibda o‘rganib chiqilib, mutaxassislar tomonidan maslahat va tavsiyalar berib borilmoqda.  

–Qabulimga 40 ga yaqin keksalar tashrif buyurdi, – deydi kardiolog Hayot Abbosov. – Shundan 24 nafariga davolanish uchun maslahat va tavsiya bergan bo‘lsam, 6 nafariga konservativ va operativ davo muolajalari buyurildi.  

– Asosiysi, tibbiy ko‘rik jarayonida ishtirok etgan fuqarolarning katta qismida kardiolog, nevrologik, endokrinolog, oftalmolog, urologik va boshqa kasalliklar borligi aniqlanib sog‘lomlashtirish ishlari olib borilmoqda, – deydi Xovos tumani tibbiyot birlashmasi bosh shifokori Maqsatulla Narzullayev. – Eng muhimi, “Keksalar salomatligi oyligi” aksiyasi Xovosda, qolaversa viloyatda 1 sentyabrga qadar o‘tkazilib, unga 75 mingdan ziyod sirdaryolik keksa avlod vakillari qamrab olinadi.  

Shuhrat Suyarov, O‘zA