Куни кеча “Катта йигирматалик” гуруҳига кирувчи дунёнинг ривожланган ва ривожланаётган давлатлари раҳбарларининг икки кунлик саммити ниҳоясига етди.

Саммит илк бор пандемия шароитида ўтди. Шу боис олий даражадаги учрашув расман Саудия Арабистони пойтахти Ар-Риёдда ташкил этилган бўлса-да, амалда видеоконференция тарзда ташкил этилди. Саммит якунлари бўйича Ар-Риёд декларацияси қабул қилинди, раислик Италияга ўтди.

Якуний декларацияда йигирматалик гуруҳига кирувчи давлатлар  раҳбарлари “янги коронавирус пандемиясидан кейин дунёни кучли, барқарор, мувозанатли ва такомиллашган даврга бошлаш вазифасини ўз зиммасига олишгани қайд этилди.

Иштирокчилар бундан кейин ҳам COVID-19 билан боғлиқ оқибатларга дуч келган барча ривожланаётган ва кам ривожланган мамлакатларни соғлиқни сақлаш ҳамда иқтисодий-ижтимоий соҳаларда қўллаб-қувватлашни давом эттиришга аҳд қилди.  

Қолаверса, саммитда Африка ва унчалик катта бўлмаган ривожланаётган орол давлатлардаги муаммолар ҳам муҳокама этилди. Ривожланган мамлакатлар етакчилари Африка қитъасидаги ҳамда ривожланаётган кичик орол мамлакатларига иқтисодий кўмак беришга ваъда беришди.

Саммитда қашшоқ мамлакатлар COVID-19 га қарши вакциналар, дори-дармон ва тестлар адолат билан тақсимланиши жараёнидан четда қолмаслиги учун йигирматалик давлатлар ёрдам бериши зарурлиги таъкидланди.  

Шунингдек, декларацияда, “Катта йигирматалик” қашшоқ мамлакатлар қарзларини тўлашни тўхтатиб туриш бўйича жорий қилинган мораторийни 2021 йил июнь ойигача чўзиш бўйича якдил фикрга келишган.

Саммитда иштирокчи давлатлар раҳбарларининг баёнот беришича, жаҳон иқтисодиёти тикланишни бошламоқда, бироқ бу жараён "нотекис, анчайин қоронғи ва тушкунлик хавфи юқори"лигича қолмоқда.  

Ривожланган мамлакатлар "инсонлар ҳаёти, иш ўринлари ва даромадларини” ҳимоя қилиш учун барча воситалардан фойдаланишга ваъда беришди. Шунингдек, тараққиёт банкларининг инқирозни енгиб ўтиши учун камбағал мамлакатларга ёрдам беришни фаоллаштириш зарурлиги таъкидланди.  

"Кўп томонлама савдо тизимларини қўллаб-қувватлаш ҳар галгидан ҳам муҳим. Биз эркин, адолатли, инклюзив, камситилмаган, шаффоф, барқарор савдо ва инвестиция муҳитини яратишга ҳамда чегараларни очиб қўйишга келишиб олдик. Шунингдек, яхши бизнес-муҳит яратиш учун тенг шароитларни таъминлаш устида ишларни давом эттирамиз", – дейилади ҳужжатда.

"Йигирматалик гуруҳи” 1999 йилдан бошлаб дунёнинг ривожланган ва ривожланаётган мамлакатларини жамлаган норасмий бирлашма ҳисбланади. Ушбу гуруҳга 19 та (Австралия, Аргентина, Бразилия, Буюк Британия, Германия, Ҳиндистон, Индонезия, Италия, Канада, Хитой, Мексика, Россия, Саудия Арабистони, АҚШ, Туркия, Франция, ЖАР, Жанубий Корея ва  Япония) ҳамда Евроиттифоқ давлатлари аъзо ҳисобланади.

ЎзА