Мамлакатимиз иқтисодиётини барқарор ривожлантириш ва аҳоли турмуш фаровонлигини оширишда сифатли дон етиштириш, сифатли ун маҳсулотлари тайёрлаш муҳим ўрин тутади. Шу боис мавсумда юқори ҳосилдорликка эришиш учун сифатли уруғлик дон етиштиришга алоҳида эътибор қаратилмоқда.
Уруғчиликда эса энг муҳим ва долзарб жараён бу апробация кўригини сифатли ўтказилишидир. Бу тадбир дала шароитида ўсимликларнинг нав жиҳатдан софлиги, зараркунанда ва касалликларнинг таъсири, экиш учун мўлжалланган уруғликларнинг умумий ҳолатини аниқлаш учун ўтказилади.
Масъул мутахассислар томонидан келгуси йил ғалла ҳосили учун серҳосил, навдорлик сифат кўрсаткичлари давлат стандартларига тўлиқ жавоб берадиган уруғлик дон жамғариш мақсадида, уруғлик ғалла майдонларда апробация кўригига тайёрлаш ишлари бошлаб юборилган.
Ўзагроинспекциянинг Тошкент вилояти бошқармаси бош мутахассиси Ш.Усубалиевнинг қайд этишича, ҳудудда 2025 йил ҳосилидан 159 та фермер хўжаликлари, элита уруғлик хўжаликлари, илмий тадқиқот институтлари томонидан 8 минг бир гектар уруғлик ғалла майдонларда бошоқли дон экинларнинг 17 та навидан жами 5 минг 700 тонна сифатли сара уруғлик дон тайёрлаш белгиланган.
Шундан “кўпайтириш кўчатзори” 1 минг 18 гектар, “оригинал” авлодидан 6 минг 172 гектар, “элита” авлодидан 751 гектар майдон уруғлик ғалла парваришланмоқда. Айтиш жоиз, Агросаноат мажмуи устидан назорат қилиш инспекциясининг ҳудудий бошқармаси ва туман бўлимлари инспекторлари томонидан Вазирлар Маҳкамасининг 2021 йил 12 октябрдаги “Қишлоқ хўжалиги экинлари уруғчилигига оид айрим норматив-ҳуқуқий ҳужжатларни тасдиқлаш тўғрисида”ги қарори билан тасдиқланган Низом талаблари асосида тизимли ишлар қилинмоқда.
Шу билан бирга, Ўзбекистон Республикаси “Уруғчилик тўғрисида”ги Қонунининг тегишли моддасига асосан уруғлик дон қабул қилувчи уруғлик цехларининг масъул ва жавобгар шахслари томонидан жорий йилда уруғлик материалларини қабул қилиш, жойлаштиришда стандартлар талабига амал қилиниши ҳамда апробация комиссия аъзолари белгиланган талабалар асосида ўтказиш бўйича тизимли ишлари олиб борилмоқда.
Бугунги кунда амалга оширилаётган бу тадбирлар натижасида 2026 йил ғалла ҳосили учун навдорлик сифат кўрсаткичлари юқори бўлган, серҳосил ғалла навларидан уруғлик дон жамғарилишда фойдаланилади. Айни кунларда Тошкент вилояти бўйича ғалла ўрим-йиғимига тайёргарлик уюшқоқлик билан амалга оширилмоқда. Ўз навбатида ҳосилни нест-нобуд қилмай, қисқа фурсатларда йиғиштириб олиш учун ўрим-йиғимга пухта тайёргарлик кўрилган.
Шу мақсадда мавжуд жами 217 дона ғалла ўриш комбайнларини сифатли таъмирлаш ишларига ҳар йилгидан ҳам эртароқ киришилди. Бунинг учун 7 миллиард 441 миллион сўм пул маблағлари таъминотчи корхоналарга эҳтиёт қисмлар харид қилиш учун чиқарилган.
Ғалла комбайнларини таъмирлаш ишлари якунланганлари мавсумга тайёргарлик чизиғига қўйилмоқда.
А.Мусаев,ЎзА.