Dildora (ayrim sabablarga ko‘ra ismlar o‘zgartirildi)ota-onasining roziligi bilan uzoq qarindoshiga turmushga chiqadi. Ammo uning ko‘nglida farzandlarimiz sog‘lom tug‘ilarmikan, degan xavotir bor edi. Uni kattalar “Qarindoshchiligimiz juda ham uzoq, hech narsa qilmaydi”, deb yupatishadi. Haqiqatan ham qizalog‘i sog‘lom, baquvvat dunyoga keladi. Ammo 3 yoshga to‘lgach, qizaloqni qorni kattalasha boshlaydi. Uzoq tekshiruv va tahlil natijalaridan so‘ng unga jigar sirrozi tashxisi qo‘yiladi. Shifokorlarni aytishlaricha, bu genetik kasallik ekan.

— Qizimni kasalligi haqida eshitgach, avvaliga shifokorlar adashyaptiyov, degan, o‘y bilan ishonmadim,—deydi Dildora. – Tashxis aniq bo‘lgach, shok holatiga tushdim. Bunga ishonmasligimga sabab bor edi. Chunki biz juda uzoq qarindoshlarmiz. Nachora qarindosh-urug‘lar o‘rtasidagi nikohdan dunyoga kelgan bolalar aziyat chekarkan. Endi har uch oyda qizimni davolatib turishga majburman.

Oramizda Dildora kabi qarindosh-urug‘ nikohi tufayli farzandi genetik kasallikka chalingan ota-onalar bor. Bunday bemor bolalarni davolash, kasallikni erta aniqlash maqsadida Fanlar akademiyasi immunologiya va inson genomikasi instituti olimlari tomonidan sa’y-harakatlar olib borilmoqda.

Mazkur institut bilan hamkorlikda faoliyat yuritayotgan akademik N.P.Bochkov nomidagi tibbiy genetik ilmiy markazi Toshkent filiali - Toshkent tibbiy-genetik ilmiy markaziga press-tur tashkil etildi. Press-turda OAV vakillari markaz faoliyati bilan yaqindan tanishib, mutaxassislar bilan muloqot qilib, o‘zlarini qiziqtirgan savollarga javob oldilar.

Shuningdek, mazkur markazda mutaxassislar uchun ikkinchi xalqaro maktab ham tashkil etildi. Bu safargi maktab jigar kasalliklariga bog‘liq bo‘lgan nasliy kasalliklarga bag‘ishlandi. Hozirgacha 40 nafarga yaqin aniq tashxis qo‘yilmagan yoki davolanish jarayonidagi bemorlar markazga chaqirilib, Moskvadan kelgan mutaxassislardan konsultatsiya olishmoqda. Ushbu tadbir Genetik kasallikka chalingan bemor bolalarni tashxislash va ularni davolash choralarini belgilash maqsadida tashkil etildi. Jarayonlar 28 fevralgacha davom etadi.

Bunday tadbirlar yurtimizdagi genetik soha mutaxassislarini bilim va tajribalarini oshirish, yangi bilimlar bilan boyitish,tashxis qo‘yish, davolash muammoli bo‘lgan bemorlarga yordam berishiga umid qilamiz.

<iframe width="650" height="420" src="https://www.youtube.com/embed/BVRVlsrmxkw" title="Kasallik qancha erta aniqlansa, uni davolash shunchalik oson kechadi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

N.Rahmonova, A. Mamadaminov (surat), O‘zA