Шу кунларда Миср пойтахти Қоҳирада каратэ WKF бўйича ўтаётган жаҳон чемпионатида Ўзбекистон терма жамоаси аъзолари кетма-кет ютуқларга эришиб, тарихий натижаларни қайд этмоқда.

Қувонарлиси, 86 та давлатнинг 380 нафардан ошиқ маҳоратли каратэчилари қатнашаётган чемпионатнинг икки кун давомидаги саралаш баҳсларида юртимиз каратэчилари муваффақиятли қатнашди.

Терма жамоамиз аъзоси Гулшан Алимардонова -50 килограмм вазнда финал йўлланмасини қўлга киритди. Бу билан юртимиз каратэ тарихида илк бор аёл спортчи жаҳон чемпионлиги учун татамига чиқадиган бўлди.

Бугун, 30 ноябрь куни жаҳон чемпионати финалида ҳамюртимиз Гулшан Алимардонова олтин медаль учун кечадиган жангда Малайзия вакили Шахмаларани Чандран билан куч синашади.

Шунингдек, бугун терма жамоамиз аъзоси Абдулваҳоб Рашидов -67 килограммда грециялик Георгиос Балиотис билан, Меҳриддин Тўрахонов -60 клограммда япониялик Хирому Хашимото билан бронза медали учун баҳсда рўбарў келади.

Т.Рўзиев, ЎзА