Франция пойтахти Парижда каратэ бўйича жаҳон чемпионати саралаш турнирида муваффақиятга эришган 24 нафар спортчидан бири Ўзбекистон вакили экани эътиборли воқелик бўлди.

105 та мамлакатнинг 684 нафар каратэчиси иштирок этган нуфузли турнирда спортчилар ўз вазн тоифаларида жаҳон чемпионати йўлланмаси учун баҳс олиб боришди.

Ўзбекистон терма жамоаси аъзоси Севинч Раҳимова -55 килограмм вазн тоифасининг саралаш баҳсларида рақибларини доғда қолдириб, жаҳон чемпионати йўлланмалари йўлидаги курашларда қатнашиш ҳуқуқини қўлга киритди.

Маҳоратли каратэчи қизимиз йўлланмаларни тақдим этадиган асосий тўқнашувларнинг кетма-кет учта жангида рақибларидан устунликка эришди. Ҳал қилувчи беллашувда татамига чиққан Раҳимова юқори техник маҳоратга эга эканини намойиш этиб, хорватиялик Лаура Лисацни 4-0 ҳисобида енгди.

Ушбу натижа терма жамоамиз аъзоси учун ҳар икки йилда бир марта ташкил этиладиган жаҳон чемпионати йўлланмасини тақдим этди.

Шунингдек, саралаш мусобақаларидан омадли ўтган терма жамоамизнинг яна бир аъзоси Акбаршоҳ Омонуллаевда ҳам жаҳон чемпионати йўлланмасини қўлга киритиш имконияти бор эди. Бироқ, чемпионат йўлланмасини тақдим этадиган сўнгги жангда ўзбекистонлик каратэчи Халқаро каратэ федерацияси байроғи остида турнирда қатнашган россиялик Макар Головинга 5:3 кўринишида йўл берди.

Эслатиб ўтамиз, каратэ бўйича 27-жаҳон чемпионатининг финал мусобақалари жорий йилнинг 27-30 ноябрь кунлари Миср пойтахти Қоҳирада бўлиб ўтади.

Т.Рўзиев,

ЎзА