Қозоғистонда ўтган Осиё каратэ федерацияси (AKF) ижроия қўмитасининг навбатдаги конференциясида 2021 йил якунлари ва келгуси йил режалари муҳокама қилинди.

Бутунжаҳон каратэ федерацияси президенти Антонио Эспинос, Осиё каратэ федерациясининг биринчи вице-президенти, ҳамюртимиз Алам Муллаев иштирок этган йиғилиш давомида делегатларнинг овоз бериши ва муҳокамалар натижасида 2022 йилда бир йўла иккита Осиё чемпионатига Ўзбекистон мезбон сифатида танланди, дея хабар бермоқда Туризм ва спорт вазирлиги. 

Унга кўра, катталар ўртасидаги Осиё чемпионати ва 14 ёшдан 21 ёшгача бўлганлар ўртасидаги қитъанинг энг нуфузли мусобақалари мамлакатимизда бўлиб ўтади. 

Режага асосан қитъа биринчилиги келгуси йил Хитойда ўтадиган ёзги Осиё ўйинларидан аввал ўтказилиши кўзда тутилган. Бу эса юртимиз каратэчилари учун қитъа ўйинлари олдидан ўзига хос тайёргарлик вазифасини ўташи шубҳасиз. 

Конференцияда шунингдек, Осиё каратэ федерациясининг бир қатор комиссияларига номзодлар сайланди. Эътиборлиси, ҳамюртимиз Анвар Муҳаммедов Осиё каратэ федерацияси (AKF)нинг мусобақаларни ташкил этиш қўмитаси аъзолигига сайланди.  

Эслатиб ўтамиз, 2019 йил июль ойида катталар ўртасидаги қитъа чемпионати Тошкентда ташкил этилган эди. 

 

Тўлқин Рўзиев, ЎзА