Тумандаги “Темир жиҳоз сервис” масъулияти чекланган жамиятида 2019 йилда 17 миллиард сўмдан ортиқ қийматдаги 4323 тонна арматура ишлаб чиқарилган. Аммо бу йил корхона фаолият кўрсатмади,150 киши ишсиз, даромадсиз қолди.

– 2004 йилда темир панжара ва эшик ишлаб чиқариш билан фаолият бошлагандик, – дейди корхона раҳбари Бахтиёр Одилов. – 2015 йилдан иккиламчи темир парчаларини қайта ишлаш ҳисобига арматура ишлаб чиқариш йўлга қўйилган эди. 160 нафар маҳаллий аҳоли бандлиги таъминланганди. Фаолиятимизни янада ривожлантириш, энергия сарфини камайтириш мақсадида жорий йил бошида Туркиядан замонавий ускуналарни олиб келган эдик. Афсуски, пандемия сабаб ускуналарни ўрнатиб, ишга тушириш учун туркиялик мутахассислар кела олмади. Шунингдек, амалдаги тартиб бўйича биз темир парчаларни хориждан олишга мажбурмиз. Шу пайтгача Қозоғистон ва Қирғиз республикларидан олиб келинган темир парчалар карантин сабаб тўхтаб қолди ва таннархи ошиб кетди. Оқибатда ўтган йиллар давомида миллиардлаб сўм маҳсулот чиқарган корхона фаолияти тўхтаб қолди. Энг ачинарлиси, 160 нафар ишчидан бор-йўғи 10 нафарини ишлатиб турдик, холос. Айни пайтда давлатимиз раҳбари томонидан мамлакат парламентига иккиламчи қора металлни биржа савдоларига чиқариш бўйича таклиф берилган. Агар ушбу ташаббус амалга ошса, биз ҳам хориждан хомашё қидирмай, фаолиятимиз самарадорлиги янада ошади.

Туман ҳокимлиги томонидан бугунги кунда биринчи навбатда иқтисодий тармоқлар фаолиятини ўз вақтида тиклаш орқали барқарор ривожланишни таъминлашга эътибор қаратилмоқда. Мамлакатда каратин тартибини босқичма-босқич юмшатилиши натижасида корхоналар фаолияти тикланмоқда.

– 2020 йил 1 апрель ҳолатида туманимизда 565 та саноат корхонаси фаолият кўрсатиб келаётган эди, – дейди Самарқанд тумани ҳокимининг биринчи ўринбосари Искандар Комилов. – Бу корхоналарда биринчи чоракда 205,5 миллиард сўмлик маҳсулот ишлаб чиқарилиб, ишлаб чиқариш ҳажми ўтган йилнинг мос даврига нисбатан 103,1 фоизни ташкил этган эди. Аммо карантин даврида асосий саноат зонаси “қизил ҳудуд”га кирганлиги сабабли, ишлаб чиқариш ҳажмида пасайиш кузатилди. Бу даврда корхоналар томонидан 560 миллиард сўмлик маҳсулотлар ишлаб чиқарилиб, ўтган йилнинг мос даврига нисбатан 71,7 фоизни ташкил этди. Ишлаб чиқариш учун зарур бўлган бутловчи буюмлар ва хом ашёнинг ўз вақтида хориждан етиб келмаганлиги, ички ва ташқи бозордаги реализация ҳажмининг камайганлиги, карантин даврида корхоналарни тўла қувватда ишламаганлиги бунга сабаб бўлди. Карантин талабларининг босқичма-босқич юмшатилиши билан 91 та корхона ўз фолиятини тиклади. Қолган корхоналарда ҳам ишлаб чиқариш қувватлари оширилмоқда. Учинчи чорак якуни билан 1 триллион 116 миллиард сўмлик саноат маҳсулотлари ишлаб чиқариш ҳамда олдимизга қўйган режани 103,7 фоизга бажаришни режалаштирганмиз.

Тумандаги “Интер кристал савдо сервис” масъулияти чекланган жамияти ҳам икки ой фаолият кўрсатмади. Бугун эса корхона фаолиятини тиклаб, турли ўлчамдаги металл қувур ва профиллар ишлаб чиқармоқда. Иш юритувчи Комил Ҳамдамовнинг айтишича, ойлик ишлаб чиқариш қувватини 3,5-4 минг тоннага етказиб, карантин давридаги зарарни қоплаш ҳам йил якунига билан белгиланган прогноз кўрсаткичларига эришиш мумкин.

Бугунги кунда барча ҳудудларда аҳоли бандлигини таъминлаш энг долзарб вазифа бўлиб турган чоғда Самарқанд туманида ҳам бу борада саноат корхоналари фаолиятини ривожлантириш билан бирга, янги ишлаб чиқариш субъектлари ташкил этишга ҳам алоҳида эътибор қаратилмоқда. Жумладан, 2019 йил охирида фаолият бошлаган “Агро сой пласт” масъулияти чекланган жамиятида қишлоқ хўжалик маҳсулотлари етиштирилиб, ўзига хос тарзда қайта ишловдан сўнг музлатилган ҳолда Европа давлатларига экспорт қилинмоқда. Жорий йилнинг ўтган даврида корхона фаолияти кенгайтирилиб, 1 миллион долларлик маҳсулот экспорти амалга оширилди. Энг муҳими, 50 киши доимий иш ўрнига эга бўлди. – Корхонамизга Польша ва Германияда ишлаб чиқарилган 5 миллион доллар қийматидаги қайта ишлаш ускунлари ва музлаткичлар ўрнатилган, – дейди корхона раҳбари Содиқ Эргашов. – Бир қабул жараёнида 6 минг тонна маҳсулот қайта ишланиб, музлатилади. Айни пайтда тасарруфимиздаги 135 гектар майдонда қишлоқ хўжалик маҳсулотлари етиштириб, қайта ишлаяпмиз. Мазкур жараёнда 150 киши мавсумий ишга жалб қилинади.

Туман ҳокимлигидан олинган маълумотларга кўра, 2020 йил август-декабрь ойларида жорий тушумлар, корхоналар фаолиятини тиклаш, қувватини ошириш, ишлаб чиқаришни кенгайтириш, янги лойиҳаларни амалга ошириш ва хуфиёна иқтисодиётни қисқартиш ҳисобига бюджет даромадларини ошириш кўзда тутилган. Энг муҳими, бюджетга жалб қилинган қўшимча даромадлар ҳисобидан “Саховат ва кўмак” жамғармасига 3 миллиард 926 миллион сўм маблағ ажратиш кўзда тутилган.