Pokistonning eng yirik shahri – Karachida joylashgan “Gul Plaza” savdo markazida kuchli yong‘in sodir bo‘ldi. Hodisa oqibatida kamida 11 kishi halok bo‘lgan, 60 nafardan ortiq insonning taqdiri esa hozircha noma’lum.

Maxsus xizmat vakillari vayrona ostida qolgani taxmin qilinayotgan fuqarolarni qidirishda davom etyapti.

18 yanvar kuni kechqurun shaharning ishbilarmonlik hududida joylashgan bir necha qavatli yirik savdo majmuasida chiqqan olovni o‘chirish uchun 24 soatdan ziyod vaqt kerak bo‘ldi. Yon-atrofdagi inshootlar zich joylashgani ishni ancha qiyinlashtirgan.

O‘t o‘chiruvchilar ma’lum qilishicha, 1 200 dan ko‘p do‘kon joylashgan binoda shamollatish tizimi yetarli emasligi sabab qalin tutun tez tarqalgan. Bu holat ichkarida qolib ketganlarni topib qutqarishni sekinlashtirgan.

Yakshanba oqshomiga kelib, uyning katta qismi qulagan. Ko‘chaga metall yig‘ma parchalari, bo‘lingan qurilish materiallari, qulagan konditsioner va do‘kon peshtoqidagi yozuvlar sochilib ketgan.

Qutqaruvchilar binoning qolgan qismi ham beqaror holatda ekani, yana yiqilishi xavfi borligidan ogohlantirmoqda.

<iframe width="650" height="420" src="https://www.youtube.com/embed/KzHWjPRBVmg" title="Karachidagi savdo markazida yong‘in sodir bo‘ldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

F.Yaxshiboyeva, O‘zA