Адлия вазирлиги брифингида каннабис ўсимлигини етиштириш ва фойдаланиш бўйича ижтимоий тармоқларда тарқалган турли хил фикрлар ва муносабатларга ойдинлик киритилди.

Брифингда Адлия вазирлиги жамоатчилик билан алоқалар бўлими бошлиғи Севара Ўринбоева мавзу бўйича маълумот  берди. 

Ўзбекистон Республикасининг “Гиёҳвандлик воситалари 
ва психотроп моддалар тўғрисида”ги қонунига киритилган ўзгартиришларга мувофиқ, каннабис ўсимлигини фақат саноат мақсадларида етиштиришга рухсат берилган.

Маълумот ўрнида айтиш жоизки, Гиёҳвандлик воситалари тўғрисида Ягона Конвенциянинг (1961 йил 30 март, Нью-Йорк) 
28-моддаси иккинчи қисмида мазкур Конвенция каннабисни саноат 
ва боғдорчилик мақсадларида етиштиришга нисбатан татбиқ этилмаслиги белгиланган.

Ўзбекистон Республикасининг “Давлат божи тўғрисида”ги қонунига киритилган ўзгартиришлар билан фаолиятнинг айрим турларини Ўзбекистон Республикаси Қишлоқ хўжалиги вазирлиги томонидан лицензиялаганлик учун тўланадиган давлат божи миқдорлари тасдиқланган. 

Унга мувофиқ, таркибида гиёҳвандлик моддасининг миқдори 0,2 фоиз бўлган каннабис ўсимлигини гиёҳвандлик моддалари ва психотроп моддаларни ишлаб чиқариш ҳамда тайёрлаш билан боғлиқ бўлмаган саноат мақсадларида (тола ва уруғ) етиштириш БҲМнинг 3000 баравари, шунингдек олиб кириш, қайта ишлаш, сақлаш, реализация қилиш (бериш), олиш ва ташиш учун БҲМнинг 200 баравари миқдорлари белгиланган.

Вазирлар Маҳкамасининг “Каннабис ўсимлигини гиёҳвандлик воситалари ва психотроп моддалар ишлаб чиқариш ҳамда тайёрлаш билан боғлиқ бўлмаган саноат мақсадларида етиштириш ва фойдаланиш фаолиятини тартибга солиш чора-тадбирлари тўғрисида”ги 2020 йил 7 декабрдаги 770-сон қарори тасдиқланган бўлиб, мазкур қарор каннабис ўсимлигини гиёҳвандлик воситалари ва психотроп моддалар ишлаб чиқариш билан ҳамда тайёрлаш билан боғлиқ бўлмаган саноат мақсадларида етиштириш ва фойдаланиш фаолиятини тартибга солади.

Шуни инобатга олиш лозимки, ушбу ҳукумат қарорида каннабис ўсимлигини етиштириш ва ундан олинадиган ҳосилни қайта ишлаш ва сақлаш қатъий назоратга олиниши талаблари белгиланган бўлиб, каннабис ўсимлиги ва уни қайта ишлашдан олинадиган махсулотлар таркибида тетраканнабинол гиёҳвандлик моддасининг миқдори 0,2 фоиздан ошган тақдирда, ушбу ўсимлик, шунингдек уни қайта ишлашдан олинадиган маҳсулотлар белгиланган тартибда олиб қўйилиши ҳамда йўқ қилиниши ўрнатилган.

Мазкур ҳукумат қарори билан каннабис ўсимлигини етиштириш ва фойдаланиш фаолиятини лицензиялаш тартибини ўз ичига олган низом тасдиқланди.

Низомга кўра, каннабис ўсимлигини етиштириш ва фойдаланиш фаолиятини лицензиялаш Ўзбекистон Республикаси Қишлоқ хўжалиги вазирлиги томонидан амалга оширилади.

Каннабис ўсимлигини етиштириш ва фойдаланиш билан боғлиқ бўлган фаолият билан шуғулланиш ҳуқуқини берувчи лицензия 5 йил муддатга берилади.

Лицензия олган юридик шахс каннабис ўсимлигини етиштириш ёки сақлаш объектлари (жойлари)ни ҳуқуқни муҳофаза қилувчи органлар билан биргаликда тегишли ҳимоя қилинишини (қўриқланишини) ташкил этиши лозим. Худди шундай, каннабис ўсимлигини ташиш билан боғлиқ бўлган фаолиятда автотранспорт воситаларини тегишлича кузатувини таъминлаши лозим.

Каннабис ўсимлигини саноат мақсадларида етиштириш учун қишлоқ хўжалигида фойдаланишдан чиқарилган ерлар ажратиб берилади.

Низомга мувофиқ каннабис ўсимлигини етиштириш ва фойдаланиш фаолияти фақат юридик шахслар томонидан амалга оширилади.