Давлатимиз раҳбари томонидан спорт соҳасига катта эътибор берилмоқда. Айниқса, олимпия ва паралимпия ҳаракати, ихтисослаштирилган ва оммавий спортни ривожлантириш, ёшларни спортга кенг жалб этиш борасидаги ишлар жадаллаштирилмоқда. Спорт федерациялари ўз олдига аниқ мақсадларни белгилаб олиб, натижалар учун саъй-ҳаракатларни бошлаб юборган.

Ўзбекистон Камондан отиш федерацияси фаолиятини янги босқичга олиб чиқишга бағишланган конференцияда ҳам шу хусусдаги ишлар юзасидан сўз борди.

Қайд этиш керакки, ўтган қисқа давр мобайнида республикадаги камондан отиш спорти секциялари сони 45 тадан 686 тага, шуғулланаётган спортчи ёшлар сони 510 дан 12 минг нафарга, мураббийлар сони 60 дан 124 нафарга етказилди.

Конференция Ўзбекистон Камондан отиш федерацияси раиси – Миллий гвардия қўмондони раислигида бўлиб ўтди.

Унда Спорт вазирлиги, Миллий Олимпия қўмитаси, Миллий Паралимпия қўмитаси мутахассислари ва федерация мураббий ва спортчилари иштирок этди.

Асосий эътибор Президентимиз раҳбарлигида 2025 йил 13 февраль куни бўлиб ўтган олимпия ва паралимпия ҳаракати, ихтисослаштирилган ва оммавий спортни янги босқичга олиб чиқиш ҳамда аҳолининг жисмоний фаоллигини ошириш чора-тадбирлари бўйича ўтказилган видеоселектор йиғилишида белгилаб берилган вазифалар ижросини таъминлаш учун зарур тузилмаларни шакллантириш, истиқболдаги йўналишларни белгилаб олишга қаратилди.

Камондан отиш федерацияси ҳудудий бўлимлари бошлиғи лавозимларига кўрсатилган номзодлар маъқулланиб, тасдиқланди.

Танқидий ва таҳлилий руҳда ўтказилган конференция давомида камондан отиш спортини ривожлантиришга қаратилган давлатимиз раҳбарининг 2021 йилдаги тегишли қарорининг жойлардаги ижроси ҳамда федерациянинг истиқболдаги режалари атрофлича муҳокама қилинди.

<iframe width="650" height="420" src="https://www.youtube.com/embed/mZprJyQwfbo" title="Kamondan otish sportini rivojlantirish masalasi ko‘rildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Раҳмонова, ЎзА