Камонбозларимиз Парижда баҳслашмоқда
Франция пойтахти Париж шаҳрида камондан отиш бўйича жаҳон кубоги бошланди. 20 август кунига қадар давом этадиган мусобақада Ўзбекистон терма жамоасининг икки нафар аъзоси – Зиёдахон Абдусатторова ҳамда Амирхон Содиқов иштирок этади.
Мерганларимиз жаҳон кубоги давомида яккалик ва микст дастурларида медаллар учун кураш олиб боради.
Қайд этиш жоиз, мазкур мусобақа Париж-2024 Олимпия ўйинлари учун синов турнири вазифасини ўтаб беради. Беллашувлар XVII асрга оид “Ногиронлар уйи” саройида ташкил этилади. Айнан ушбу манзил келаси йил Олимпия ўйинларининг камондан отиш баҳсларига мезбонлик қилади.
Жавоҳир Тошхўжаев, ЎзА