– Ким камбағал бўлиши мумкин – иш жойи ва томорқаси бўлмаган, бемор ёки ногирон киши шундай вазиятга тушиши мумкин, – дейди Пайариқ тумани ҳокимининг ўринбосари, маҳалла ва оилани қўллаб-қувватлаш бўлими бошлиғи Дилфуза Мамасолиев. – Баъзида бунга ишёқмаслик, дангасалик ҳам сабаб бўлишини кўрамиз. Бундай оилалар, кишиларга бир марта, икки марта ёрдам берармиз, лекин қўлдан берганга қуш тўймас деган гап бор. Шу боис камбағал, кам таъминланган оилага пул эмас, пул топишга имконият яратиб берилса, бу ўша фуқаро учун ҳам, давлат ва жамият учун ҳам фойдали бўлади. Бугун давлатимиз ана шундай йўл тутмоқда. Жумладан, туманимизда ҳам аҳолини камбағалликдан чиқариш учун уларни иш билан таъминлаш, ер ажратиш чораларини кўряпмиз.

Куни кеча Шўртепа маҳалласида фойдаланилмай турган, лалми ердан 350 гектар майдон 500 нафардан ортиқ оилага камида 50 сотихдан имтиёзли кредит асосида ажратилди. Нима учун имтиёзли кредит ҳисобидан ажратдик? Чунки, бу ер майдонларига майизбоп узум кўчатлари экилиб, томчилаб суғориш технологияси йўлга қўйилиб, аҳолига бўлиб берилмоқда. Уларга янги ташкил этилган қишлоқ хўжалик кооперативи хизмат кўрсатади. Бу ерда ҳам беш кишининг бандлиги таъминланади. Ток кўчатлари ҳосилга киргунга қадар қатор ораларида дуккакли ёки полиз экинлари етиштириш мумкин. Кредит тўловлари тўлиқ қоплангач, ер майдонлари аҳолига деҳқон хўжалиги сифатида расмийлаштириб берилади.

Йил якунига қадар туманнинг Багара қишлоғидан яна 2000 гектар ер майдонини деҳқончилик қилиш учун аҳолига бўлиб бериш режалаштирилган.

– Шу пайтгача ишсиз эдим, – дейди Шўртепа маҳалласи Гулистон қишлоғида яшовчи Ўктам Туратошов. – Энди эса лалми майдондан менга ҳам 50 сотих ер ажратиб беришди. Бу ерларда узум яхши бўлади. Ерга ток кўчатлари экилгани ва томчилиб суғориш мумкинлиги менга маъқул бўлди. Энди шу ерда ишлаймиз.