Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси Марказий аппарати ва Тошкент вилояти бошқармаси томонидан оммавий ахборот воситалари вакиллари учун пресс-тур ташкил этилди.

Тошкент вилоятида чорвачилик йўналишида 1 минг 599 та хўжалик юритувчи субъектлар фаолият кўрсатиб келмоқда. Шулардан бири Тошкент туманидаги “Иззат” чорвачилик наслчилик фермер хўжалиги бўлиб, мазкур хўжаликка 2019 йилда Голландиядан 132 бош қорамол олиб келинган. Ҳозирги кунда хўжаликда жами 375 бош йирик шохли қорамол парваришланмоқда ва бир кунда бир бош сигирдан ўртача 22-25 литргача сут соғиб олинади. Хўжаликка тегишли озуқа экинларини етиштириш учун 85 гектар суғориладиган ер майдонлари мавжуд.

Қайд этилишича, Тошкент вилоятида чорвачилик йўналишида фаолият юритаётган жами 1 минг 599 та хўжаликдан 705 таси қорамолчиликка ихтисослашган бўлиб, мазкур хўжаликларда 89 минг 387 бош қорамол парваришланмоқда. Бугунги кунда вилоят бўйича жами 195 та наслчилик мақомига эга субъектлар мавжуд.

“Иззат” фермер хўжалигининг сутни қайта ишлаш корхонасида ҳам ишлар қонунчилик нормалари талабига кўра ташкил қилинган. Корхонада бир кунда 2 тонна сут қайта ишланиб, 20 турдаги сут ва сут маҳсулотлари ишлаб чиқарилмоқда.

Пресс-тур давомида оммавий ахборот воситалари вакиллари Паркент туманида жойлашган “Shedevr biznes oil” МЧЖ ёғ-мой корхонасида бўлди. Корхонада пахта техник чигити республика биржа савдолари орқали харид қилиниб, аҳоли истеъмоли учун сифатли ва хавфсиз ёғ-мой маҳсулотлари ҳамда чорва озуқаси ҳисобланган пахта шроти озуқаси ишлаб чиқарилади.

Корхона кунига 30 тонна пахта техник чигитни қайта ишлаш қувватига эга техникалар билан жиҳозланган. Шу кунгача ишлаб чиқарилган пахта мойи, озуқабоп маҳсулотлари ҳукумат қарорлари ва фармони талабларига биноан уларни фақат биржа савдолари орқали реализация қилинмоқда.

Мутахассисларнинг сўзларига кўра, инспекциянинг Тошкент вилоят бошқармаси томонидан корхоналарнинг пахта техник чигитини тўлиқ технологик циклда мақсадли қайта ишлаганлиги устидан доимий назорат йўлга қўйилган.

Пресс-тур якунида матбуот анжумани  ташкил этилди. Унда "Ўзагроинспекция" матбуот хизмати раҳбари Х. Шодиева ва Инспекциянинг Тошкент вилоят бошқарма бошлиғи в.в.б У.Нурбековлар инспекциянинг вилоят бошқармаси ва туман бўлимлари томонидан ўрнатилган назорат тадбирлари юзасидан иштирокчиларга ахборот берди.

Тақдим этилган маълумотларга кўра, "Ўзагроинспекция"нинг Тошкент вилояти бошқармаси ҳамда туман бўлимлари томонидан 2022 йилда 1 минг 500 донадан ортиқ қишлоқ хўжалиги, мелиорация ва йўл қурилиши техникалари рўйхатга олиниб, трактор ва бошқа ўзиюрар техникаларга 1 минг 100 донага яқин давлат рақам белгиси, 1 минг 900 донадан ортиқ техник паспорт, қишлоқ хўжалиги машина ва агрегатларига 700 донага яқин техник гувоҳнома берилган ҳамда 6 минг 600 донадан ортиқ техникалар мажбурий техник кўрикдан ўтказилган. Ҳозирда Тошкент вилоятида жами 27 мингдан ортиқ қишлоқ хўжалиги, мелиорация ва йўл қуриш техникалари давлат рўйхатидан ўтказилган бўлиб, шундан 600 га яқини чорвачилик йўналишида фаолият юритиб келаётган фермер хўжаликларига тегишли.

Муҳайё Тошқораева,
ЎзА