ФОТОРЕПОРТАЖ

Фарғона вилояти Тошлоқ туманида “Инсонга эътибор ва сифатли таълим йили”да умумтаълим мактабларида таълим-тарбия сифатини ошириш борасида амалга оширалаётган ишлар ривожига бағишланган пресс-тур бўлиб ўтди. Унда оммавий ахборот воситалари ходимларининг тумандаги умумтаълим муассасаларига ташрифи уюштирилди.

Таъкидлаш жоиз, таълим жараёнларини ислоҳ қилишда туманда илғор хорижий тажриба татбиқ этилмоқда. Хусусан, мавжуд 50 та умумтаълим мактабида ҳар бир ўқувчини иккита хорижий тил, камида битта касбга ўргатиш ҳамда 11-синфни “Ҳаёт мактаби” этиб белгилаш юзасидан амалий ишлар олиб борилмоқда.

[gallery-11861]

Бугунги кунда таълим масканларида ўқувчиларнинг касбга бўлган мойиллигидан келиб чиқиб, улар 64 турдаги ишчи касб ва 10 дан зиёд замонавий касбни ўрганишга жалб этилган. Эндиликда ўқувчилар, дарсдан кейинги вақтларини мазмунли ва самарали ўтказиш учун таълим масканининг ўзидаёқ косибчилик, чилангарлик, заргарлик, дурадгорлик каби касблар сир-асроридан бохабар бўлиш ва уларни эгаллаш имконига эга.

Пресс-тур иштирокчилари ташриф буюрган 5-умумтаълим мактабида 735 нафар ўқувчи сабоқ олади. Уларнинг 300 нафардан зиёди ўтказилган сўровномалар орқали касб-ҳунар эгаллашга бўлган иштиёқини билдирган. Ўқувчиларнинг талаби, қолаверса ички имкониятлардан келиб чиққан ҳолда мактабда 10 турдаги касбга ўргатиш бўйича мутахассислар жалб этилган.

Шу ўринда таъкидлаш керак, туманда таълим жараёнларига уйғун равишда ўқувчиларни турли спорт машғулотлари билан банд қилишга алоҳида аҳамият қаратилмоқда. Бунинг натижасида “Беш ташаббус” олимпиадасида туманнинг 32-мактаб ўқувчиларидан ташкил топган жамоаси республика босқичида биринчи ўринни эгаллаб, мактаб ҳудудида қўшимча ёпиқ турдаги спорт мажмуасини давлат бюджети ҳисобидан қурилиши учун 200 миллион сўмлик махсус сертификатни қўлга киритди. 

Муқимжон ҚОДИРОВ(сурат),ЎзА