Америка Қўшма Штатлари кейинги йилларда аралаш жанг санъатлари(UFC) бўйича энг кўп расмий чемпионлик ва турли рейтинг мусобақалари ўтказиладиган етакчи мамлакатлардан бирига айланди.

Мутахассисларнинг фикрига кўра, ҳар чоракда ўртача ҳисобда минг нафар атрофидаги хорижлик спортчи ёки спорт мутахассиси АҚШда бўладиган UFC жангларида қатнашиш ёки у ердаги машғулот залларида шуғулланиш, қайсидир промоутерлик компанияси билан шартнома имзолаш учун қўшма штатларга келади. Уларнинг ковид касаллигига қарши эмланиш ҳолати эса бугунгача тўлиқ назоратга олинмаган.

Мазкур вазиятни инобатга олган “Ultimate FIghting Championship” лигаси АҚШда ташкил этиладиган UFC мусобақаларида қатнашадиган чет элликлар Жаҳон соғлиқни сақлаш ташкилоти (ЖССТ) томонидан тасдиқланган еттита вакцинадан бири билан эмланган бўлиши лозимлигини белгилади ва бу ҳақдаги расмий баёнотни BJPenn.com сайтида эълон қилди.

Маълумотда келтирилишича, Россиянинг Спутник V вакцинаси ЖССТ томонидан тасдиқланган вакциналар рўйхатига киритилмаган. ЖССТ томонидан тасдиқланганлари эса Россия ҳудудида қўлланилмайди.

Т. Рўзиев,

ЎзА