Давлатимиз раҳбарининг 2020 йил 2 сентябрдаги “Ўзбекистон Республикасида пиллачилик ва қоракўлчиликни янада ривожлантириш чора-тадбирлари тўғрисида”ги фармонига асосан Ипакчилик ва жун саноатини ривожлантириш қўмитасига 17 миллион 416 минг гектар яйлов ер майдонлари ажратиб берилган бўлиб, ушбу майдонларда 53 та қоракўлчилик кластери ташкил этилган.

Мазкур кластерлар фаолияти гўшт, жун, ип-калава, кигиз, қўлда тўқилган жун гиламлар, тери ҳамда каврак хом ашёсини ишлаб чиқаришга ихтисослаштирилган. Бу ҳақда Миллий матбуот марказида Ўзбекистон Республикаси Ипакчилик ва жун саноатини ривожлантириш қўмитаси тизимидаги “Яйлов хўжалигини ривожлантириш” уюшмаси фаолиятига бағишланган матбуот анжуманида маълум қилинди. 

“Яйлов хўжалигини ривожлантириш” уюшмаси раиси Эркин Ҳаитовнинг қайд этишича, 2021 йилда сифатли ва экспортбоп маҳсулотлар ишлаб чиқаришни кенгайтириш ҳисобига жами 18,7 миллион АҚШ долларлик қоракўлчилик ва кавракчилик маҳсулотлари экспорти амалга оширилди. 

Жорий йилда сифатли ва экспортбоп маҳсулотлар ишлаб чиқаришни кенгайтириш ва каврак хом ашёсини йиғиб олишни кўпайтириш ҳисобига экспорт ҳамжи 25 миллион долларга етказилади. Шунингдек, 154 та янги лойиҳани ишга тушириш, мавжуд корхоналарда модернизация тадбирларини амалга ошириш ҳамда каврак плантацияларини ташкил этиш ҳисобига 318 миллион АҚШ доллари миқдорида инвестиция маблағлари ўзлаштирилади.  

Йил якунига келиб 39 минг 692 нафар доимий ва 53 минг 224 нафар мавсумий, жами тармоқда банд бўлганлар сони 92 минг 916 нафарга етказилади. 

2022 йил 1 июнга қадар Бухоро, Жиззах, Қашқадарё, Навоий, Самарқанд ва Сурхондарё вилоятларида каврак етиштириш ва йиғиш билан шуғулланувчи уй хўжаликлари ва каврак кўчатчилиги хўжалигини бирлаштирувчи кооперация усулидаги кавракчилик кластерлари ташкил этилиши белгиланган. Бу борада ҳозирда ҳар бир вилоятда олтитадан ташаббускор бўлиб, 2026 йилгача 30 минг гектар майдонда кавракни маданий усулда кўпайтириш баробарида 14 минг 210 та янги иш ўринларини яратиш режалаштирилган. 

Жорий йилда 6 минг гектар ерда маданий кавракзорлар ташкил этилади. Шундан 5 минг гектари уруғ сепиш йўли билан амалга оширилади. 100 гектар майдонга каврак кўчатлари экилади. 

Гулноза Бобоева, ЎзА