Бухоро вилоятида хориждан қайтиб келган фуқаролар бандлигини таъминлаш ва реинтеграция қилиш юзасидан зарур чоралар кўрилмоқда.

Жорий йилда вилоятдаги хориждан қайтиб келган, шунингдек, пандемия сабабли хорижга режалаштирган иш жойларига чиқиб кета олмаган фуқароларни ички меҳнат бозорига мослаштириш (реинтеграция қилиш) юзасидан “маҳаллабай” тизим асосида ишлар амалга оширилмоқда.

Жумладан, меҳнат, маҳалла ва Агентлик филиали ўзаро ҳамкорликда жорий йилнинг ўтган даврида вилоят бўйича 6 минг 152 нафар меҳнат миграциясидан қайтган фуқаро бандлиги таъминланди. Хусусан, 4 минг 294 нафар фуқаро эгаллаган касби ва мутахассислиги бўйича доимий ишга жойлаштирилиб, 1 минг 341 нафари касб-ҳунарга қайта ўқитилди. 438 нафарига белгиланган тартибда субсидиялар ажтарилди ҳамда 79 нафарига тижорат банкларининг микрокредитлари ажратиш орқали бандлиги таъминланди.

Жондор туманида 2020 йилда ташкил этилган “Жондор глобал мега текстил” корхонасида 147 нафар аҳоли доимий иш билан таъминланган. Матодан сочиқ ишлаб чиқаришга ихтисослашган мазкур корхонада ишчиларнинг 84 нафари хориждан қайтиб келганлар ва чет элда ишлаётган меҳнат мигрантларининг оила аъзоларидир.

Ташқи меҳнат миграцияси агентлиги бошлиғи ўринбосари А.Юнусов ушбу корхона ишчилари билан учрашди, улар учун яратилган шароитларни кўздан кечриб, корхонанинг келгусидаги режалари билан танишди. Агентлик ва корхона ўртасида ўзаро ҳамкорликни йўлга қўйиб, Жондор тумани ва унга яқин бўлган ҳудудлардан 80 нафар меҳнат миграциясидан қайтиб келган фуқароларни иш билан таъминлаш масалалари бўйича келишиб олинди.