Жо Байден АҚШ – Россия саммитида инсон ҳуқуқлари бузилишига доир масала ҳам муҳокама қилинишини маълум қилди
АҚШ президенти Жо Байден Россия президенти Владимир Путин билан учрашувда инсон ҳуқуқлари бузилишига доир масалани муҳокама қилиб олишини айтди.
“INTERFAX.RU” хабарида Делавэрда чиқиш қилган Байденнинг: “Икки ҳафтадан сўнг Женевада президент Путин билан учрашаман ва АҚШ ҳаракатсиз турмаслигини, инсон ҳуқуқлари бузилишига йўл қўймаслигини айтаман”, деган сўзлари иқтибос қилинган.
Байденнинг айтишича, у Хитой раиси Си Цзиньпин билан яқинда бўлиб ўтган мулоқотида ҳам инсон ҳуқуқлари масаласини муҳокама қилган.
Эслатиб ўтамиз, ўтган ҳафтада Кремл Россия-Америка саммити 16 июнда, Женевада бўлишини маълум қилган, Оқ уй бу маълумотни тасдиқлаганди.