Иккинчи жаҳон урушида фашизмга қарши курашларда жанг майдонларида ва фронт ортида беқиёс жасорат ва матонат кўрсатган, ўз Ватанини ҳимоя қилишда жонбозлик кўрсатиб, халқ орзу қилган эркинлик учун курашган миллий қаҳрамонларни ёдга олиш ҳам фарз, ҳам қарздир.

Давлатимиз раҳбарининг Иккинчи жаҳон уруши қатнашчиларига йўллаган табриги ва эсдалик совғаларини топшириш учун Жиззах вилоят прокурори Исломжон Эргашхўжаев бошчилигида, туман мудофаа бўлими, сектор раҳбарлари, «Ёшлар иттифоқи» фаоллари ва кенг жамоатчилик вакиллари Зомин тумани, «Ширин» қ.ф.й., Қизилсой қишлоғида истиқомат қилувчи Босимбек ота Бегбутаевнинг хонадонига ташриф буюришди.

Босимбек Бегбутаев 1942-1943 йилларда Совет Армияси сафида хизмат қилиб, жангларда кўрсатган жасоратлари учун II-даражали «Ватан уруши» ордени билан тақдирланган, шу билан бирга Ўзбекистон Президенти томонидан «Жасорат» медали билан мукофотланган.

Тантанали ўтган тадбирда вилоят прокурори И.Эргашхўжаев томонидан Президентимизнинг табриги ўқиб эшиттирилди ва эсдалик совғаси ҳамда 12 млн. сўм миқдоридаги пул уруш фахрийсига топширилди.

Шунингдек, 1922 йил 15 июнда Жиззах вилояти Зомин туманида туғилган, 1941-1946 йилларда Совет Армияси сафида хизмат қилган Пирназар ота Аҳмедовнинг ҳам хонадонига ташриф буюрилди.

Пирназар Аҳмедов уруш йилларида Украина, Польша, Чехословакия, Германия давлатларини фашист босқинчиларидан озод қилиш жангларида иштирок этиб, 1942 ва 1943 йилларда икки марта жароҳатланган.

Жангларда кўрсатган жасоратлари учун II-даражали «Ватан уруши» ордени, ҳамда бир қатор медали билан тақдирланган. Шу билан биргаликда Ўзбекистон Республикаси Президенти томонидан «Жасорат» медали билан мукофотланган.

Тантанали ўтган тадбирда вилоят прокурори И.Эргашхўжаев томонидан Президентимизнинг табриги ўқиб эшиттирилди ва эсдалик совғаси ҳамда 12 млн. сўм пул уруш фахрийсига топширилди.

Бундан ташқари, уруш фахрийларига вилоят ҳокимлиги, вилоят прокуратураси ва туман мудофаа ва ҳарбий қисм вакиллари ҳам ўзларининг қимматбаҳо совғаларини топширишди.

ЎзА