Жиззах шаҳридаги “JIZZAKH CYBER ARENA” мажмуасида 2 кун давомида ўтказилган спортнинг “Ўзбек жанг санъати” бўйича республика кубоги баҳслари ниҳоясига етди.

Қорақалпоғистон Республикаси, вилоятлар ва Тошкент шаҳридан келган жами 800 нафардан ортиқ ёш спортчи 3 та – “Мерган чавандоз”, “Мерган спортчи” ҳамда “Темурийлар беллашуви” йўналишларида ўз маҳоратларини синовдан ўтказди.  

Турнир якунига кўра, Анвар Нуралиев,Муҳаммадали Умрқулов мураббийлигида   шуғулланаётган жиззахлик спортчи ёшлар биринчи ўринни эгаллаб, республика кубоги сохиби бўлди.  

Тошкент вилояти ва Тошкент шаҳри “Ўзбек жанг санъати” усталари эса иккинчи ва учинчи ўринларни эгаллади.

Беллашув “Ўзбек жанг санъати” бўйича жорий йилнинг 2-4 ноябрь кунлари Тошкент шаҳрида ўтиши белгиланган жаҳон чемпионатида иштирок этадиган мамлакатимиз терма жамоаси аъзоларини саралаб олиш вазифасини ўтади. Жиззахда ўтган турнирда саралаб олинган маҳоратли спортчилар терма жамоа номидан республикамиз шарафини  ҳимоя қилади.

Ғолиб ва совриндорлар ташкилотчилар томонидан тақдирланди.

А.Қаюмов, Ж.Ёрбеков (сурат),  

ЎзА мухбирлари