Hududda tayyor mahsulot ishlab chiqarishni ragʻbatlantirish va kengaytirishga qaratilayotgan eʼtibor samarasida isteʼmol tovarlarining sanoatdagi ulushi sezilarli darajada ortdi.

Paxtakor tumanidagi “Bunyod-dur teks” MCHJga hududdagi boʻsh turgan bino “nol” xarid qiymatida berilib, tayyor trikotaj mahsulotlari ishlab chiqarish loyihasini amalga oshirishga bir yil avval kirishilgan edi. Tijorat bankining 4 ming dollarlik krediti koʻmagida Germaniya va Turkiyadan keltirilgan zamonaviy texnologiyalari bilan jihozlangan korxonaning birinchi bosqichi joriy yil oʻrtasida ishga tushirildi.

Ayni paytda korxonaning tikuvchilik sexida 50 ish oʻrni yaratilib, kuniga 5 mingta bolalar kiyimi ishlab chiqarilmoqda.

– Korxona toʻliq ish boshlagach, yiliga 150 million dona tayyor kiyim ishlab chiqariladi, – deydi masʼuliyati cheklangan jamiyati ish boshqaruvchisi Bobir Mamasoliyev. – Shuningdek, ishlab chiqarish jarayoniga bichish-tikish, gul bosish, qadoqlash jarayonlari toʻliq qamrab olinadi. Mahsulotning asosiy qismini eksportga yoʻnaltirish moʻljallangan.

Korxona loyiha quvvatiga erishgach, ish oʻrinlari 200 taga yetkaziladi.