Xalqaro sport musobaqalarida yuksak natijalarga erishgan professional sportchilarning ilk qadami oiladan, maktabdan boshlanadi.

O‘zbek sport maktabining dovrug‘ini dunyoga doston etgan afsonaviy bokschimiz Rufat Risqiyevmi, futbol afsonasiga aylangan Birodar Abduraimovmi, yaqin o‘tmishda dong taratgan Mirjalol Qosimov yoki birinchi yozgi Olimpiya o‘yinlari g‘olibi Muhammadqodir Abdullayevmi, bugungi kun sportimiz qahramonlari Bahodir Jalolov, Abduqodir Husanov, Eldor Shomurodov, Diyora Keldiyorova, Akbar Jo‘rayev, Ruslan Nuriddinov, barcha-barchasining sport turlariga, mashg‘ulotlarga qiziqishi ortishida jismoniy tarbiya fani o‘qituvchilarining alohida o‘rni bor.

Xo‘sh, yurtimizda umumiy o‘rta ta’lim maktablarida jismoniy tarbiya fanini o‘qitish talab darajasidami? Mavjud ta’lim dargohlarida yoshlarga jismoniy tarbiya mashg‘ulotlaridan saboq berayotgan, yoshlarda sportga qiziqishni oshirishi kerak bo‘lgan o‘qituvchilarning malaka ko‘nikmasi yetarlimi?

2018 yildan davlatimiz rahbarining ko‘rsatmalari asosida sport ta’limini takomillashtirish, malakali murabbiy-o‘qituvchilarni tayyorlash, sport inventarlari bilan ta’minlash, sport majmualarni ta’mirlash, qurish, obodonlashtirish infratuzilmasini yangi bosqichga olib chiqish borasida misli ko‘rilmagan sa’y-harakatlar amalga oshirildiki, qisqa fursatda mamlakatimizdagi mavjud o‘rta ta’lim maskanlaridagi jismoniy tarbiya va sport tuzilmasi “ko‘rkam bog‘” ko‘rinishini oldi, desak mubolag‘a bo‘lmaydi.

Yetti-sakkiz yil maktab sport zali ostonasini xatlamagan kishi bugun ushbu maskanlarga qadam qo‘ysa hayratga tushishi bor gap. Bir paytlari bitta voleybol to‘pi topilmagan, oddiy shaxmat jihozlariga ega bo‘lmagan ta’lim maskanlari olib borilgan tizimli ishlar natijasida zamonaviy sport jihoz va inventarlariga ega bo‘ldi.

O‘zbekiston Respublikasi Prezidentining 2024 yil 15 noyabrda imzolagan “Umumiy o‘rta ta’lim maktablarida jismoniy tarbiya fani o‘qitilishini tubdan takomillashtirish hamda ushbu fan o‘qituvchilarining kasbiy faoliyatini rivojlantirish chora-tadbirlari to‘g‘risida”gi qarori asosida jismoniy tarbiya o‘qituvchilarining bilimi oshirilishiga yetarli zamin yaratildi. Eng muhimi, o‘quvchilarning musobaqalardagi ishtiroki, maktab sport klublarining faoliyati, yoshlarning sport mashg‘ulotlari bilan qamrab olinganlik darajasini aniqlash yuzasidan reyting tizimi vujudga keltirish platformasi yaratilishiga zamin tayyorladi.

Mazkur qarorga binoan Maktabgacha va maktab ta’limi vazirligi hamda O‘zbekiston Respublikasi Sport vazirligi hamkorligida umumiy o‘rta ta’lim tashkilotlarining jismoniy tarbiya fani pedagog kadrlarini o‘quv fanidan malaka sinovlarini tashkil etish yo‘lga qo‘yildiki, bu, jismoniy tarbiya darslarini tashkil etishning zamonaviy innovatsion texnologiyalari, o‘qitishning samarali shakllari va usullaridan foydalangan holda ilg‘or xorijiy tajribalarni joriy etish, o‘qituvchilarning kasbiy mahoratini oshirib borishni ta’minlamoqda.

Malakasi oshgan, jismoniy tarbiya darslariga yangicha yo‘nalish va jarayonlarni tatbiq etayotgan mutaxassislar orqali o‘quvchilardan sport sinovlari qabul qilish yo‘lga qo‘yildi.

Natijada o‘tgan yilning 1 aprel-17 may kunlari respublikamizdagi 10 134 ta umumiy o‘rta ta’lim maktablarining o‘qituvchilari tomonidan 5 million 259 ming nafar 1-11 sinf o‘quvchilari sport sinovlarini topshirish uchun elektron tizimdan o‘tkazildi.

Mazkur ishlarda samaradorlikka erishish, aholi vakillarini ham sog‘lom turmush tarzi tamoyillari bilan qamrab olish maqsadida Qoraqalpog‘iston Respublikasi, viloyatlar va Toshkent shahar hududlarining 208 ta tuman va shaharlarida joylashgan 254 ta sport maktablarining 1 ming 890 nafar trener-seleksionerlari 9 ming 453 ta mahallaga biriktirilishiga muvaffaq bo‘lindi.

Ushbu harakatlarning pirovard maqsadi, jismoniy tarbiya fani o‘qituvchilarining erishgan natijasiga qarab, ya’ni o‘quvchi yoshlarning sport yutuqlaridan kelib chiqib malaka toifasiga erishishini ta’minlash asnosida baholash tizimlari, reyting ko‘rsatkichlari yaratiladi. Bu mahoratli sportchi yoshlarning kamolga yetishiga sharoit yaratishi bilan ahamiyatlidir.

To‘lqin Ro‘ziyev, O‘zA