Жаҳон иқтисодиёти ва дипломатия университетида Марказий Евроосиё тадқиқотлари жамияти ва Европа Марказий Осиё тадқиқотлари жамияти ҳамкорлигида еттинчи халқаро ёзги конференция ўз ишини бошлади.
Анжуманда сиёсий фанлар, халқаро муносабатлар, иқтисод, молия, ҳуқуқ, тарих, антропология, маданиятшунослик, диншунослик, таълим, медиашунослик, социология ва бошқа соҳалар бўйича Марказий Осиё минтақаси, АҚШ, Буюк Британия, Германия, Франция, Италия, Нидерландия, Россия, Ҳиндистон, Покистон сингари 30 дан зиёд давлатдан 250 нафарга яқин олим ҳамда эксперт иштирок этмоқда.
Тадбирнинг биринчи кунида Марказий Евроосиёнинг тарихий ривожланиши, минтақа маданияти ва санъатининг ўзига хос хусусиятлари, юртимиздаги ҳозирги трансформация жараёнининг аҳамияти ва устувор йўналишлари муҳокама қилинди. Ҳудудда савдо ва инвестиция адмашинуви, бошқа минтақалар билан интеграция, туризмни ривожлантириш истиқболи, минтақавий ҳамкорликнинг муваффақиятли моделини жорий этиш ҳамда ўзаро боғлиқлик масалалари таҳлил этилди.
[gallery-7686]
Қизғин кечган давра суҳбати давомида хавфсизлик ва барқарорликни таъминлаш, иқтисодий салоҳиятни кўтариш, транзит ҳамда логистикани ривожлантириш, шунингдек, Марказий Осиё мамлакатларида қонунчилик базасини такомиллаштириш мавзулари ҳам кўтарилди. Қолаверса, мамлакатимизда амалга оширилаётган ислоҳот ва ўзгаришларнинг юқори суръати, минтақавий жараённи тубдан ўзгартирган яхши қўшничилик сиёсатига алоҳида урғу берилди.
Умуман, мазкур конференция Марказий Евроосиёда яқин йилларга мўлжалланган академик тадқиқотларнинг устувор йўналишларини белгилаш, дунёнинг мамлакатлари илмий жамоатчилиги вакиллари ўртасида мустаҳкам алоқа ўрнатиш, республикамизда амалга оширилаётган изчил ислоҳотлар натижасини халқаро миқёсда кенг тарғиб қилиш, Янги Ўзбекистонни бутун дунёга танитиш имконини беради.
Дунёнинг етакчи илмий марказлари билан ҳамкорликни янада ривожлантиришга хизмат қиладиган мазкур анжуман давомида мамлакатимиз олимлари энг замонавий илмий тадқиқотлар билан яқиндан танишадилар.
Халқаро конференция ҳафта сўнгига қадар давом этади.
Улуғбек Маҳмирзаев, Даврон Эрназоров (сурат), ЎзА.