Tadbirda Oʻzbekiston yoshlar ittifoqi vakillari, oliy taʼlim muassasalari talabalari turizm, taʼlim tizimi va innovatsion mavzularga oid oʻz taqdimotlari bilan qatnashdi.

Konferensiyada Oʻzbekiston va AQSH taʼlim tizimi, yoshlar tashkilotlari faoliyati, jamiyat taraqqiyotida xotin-qizlarning oʻrni, yetakchilik qobiliyatini shakllantirish va qoʻllab-quvvatlash, bandlik kabi masalalar yuzasidan fikr almashildi.

– Anjumanda nogironlar va keksalar uchun ixtiyoriy madaniy dasturlar tashkil etish gʻoyasi bilan qatnashdim, – deydi Oʻzbekiston davlat jahon tillari universiteti talabasi Moʻydinjon Yoqubov. – Koʻngilli yoshlar safini kengaytirish orqali ushbu aksiyani mamlakatimiz boʻylab amalga oshirish mumkin. Yurtimiz talaba-yoshlarining ana shunday tashabbuslari amerikalik yoshlarda katta qiziqish uygʻotdi. Shu bois, bu kabi ijtimoiy loyihalarni amalga oshirishga qaratilgan tajriba almashuvlarni davom ettirishni rejalashtirganmiz.

Tadbir soʻnggida yoshlarning xalqaro hamkorlikdagi muzokaralarni davom ettirishga doir takliflari ishlab chiqildi.