– Америка Қўшма Штатлари ва Россия билан музокарада силжишга эришилди, – деди Украина Миллий хавфсизлик ва мудофаа кенгаши котиби Рустем Умеров. – Сиёсий ва ҳарбий масала, хавфсизлик шарти ва эҳтимолий ечимни амалга ошириш механизми муҳокама қилинди. Баъзи жиҳатлар аниқланди, айримлари қўшимча мувофиқлаштиришни талаб этади. Жараённи якунлайдиган асосий қоида устида ишлашга эътибор қаратяпмиз. Тараққиёт бор, аммо ҳозирги босқичда тафсилотни ошкор қилиб бўлмайди. Кейинги қадам ишлаб чиқилган ечимни кўриб чиқиш учун Президентларга тақдим этиш, зарур келишувга эришиш бўлади.

Маълумки, уч давлат иштирокидаги мулоқот 17-18 февраль кунлари Женевада бўлиб ўтди. Россия делегациясига Президент ёрдамчиси Владимир Мединский бошчилик қилди.

Учрашувда АҚШ Президенти элчиси Стив Уиткофф ва Дональд Трампнинг куёви Жаред Кушнер ҳам иштирок этган. Украина делегациясига Владимир Зеленский маъмурияти раҳбари Кирилл Буданов бошчилик қилган.

– Учинчи босқич қийин кечди, – деди Мединский. – Музокара икки кун давом этди: кеча турли форматларда жуда узоқ вақт ва бугун тахминан икки соат. Мураккаб, шу билан бирга самарали суҳбат бўлди.

Шунингдек, РФ вакили кейинги учрашув яқин орада ўтказилишини қўшимча қилган.

“РИА Новости” манбаси бугунги мулоқотдан сўнг мамлакатлар вакиллари ҳеч бир ҳужжатни имзоламаганига эътибор қаратган.

Кеча Швейцарияда бошланган тинчлик музокарасининг навбатдаги босқичи биринчи куни олти соат давом этган. “РИА Новости” хабарига кўра, мунозара жуда кескин кечган.

Дарвоқе, Бош вазир Кир Стармернинг хавфсизлик бўйича маслаҳатчиси Жонатан Пауэлл бошчилигидаги Буюк Британия делегацияси ҳам Женевага етиб келган. Агентлик манбаси сўзларига кўра, Қироллик вакиллари учрашув натижасини сабрсизлик билан кутган.

Январь ойи охири-февраль ойи бошида Бирлашган Араб Амирликлари Абу-Даби шаҳрида Москва, Киев ва Вашингтон вакиллари иштирокида хавфсизлик ишчи гуруҳининг ёпиқ эшиклар ортидаги мулоқоти бўлиб ўтганди. Ўшанда Қўшма Штатлар томонидан таклиф қилинган тинчлик режасида акс этган долзарб масалалар муҳокама қилинган.

Иккинчи босқичдан сўнг Россия ва Украина 157 нафардан ҳарбий асирни алмашди.

Кремль таъкидлаганидек, АҚШ ҳудудий масала Аляска саммити қарорига мувофиқ ҳал қилинмасдан туриб, узоқ муддатли келишувдан умид йўқлигини тан олган. Москва Украина Қуролли кучлари Донбассдан чиқиб кетишини талаб қилмоқда.

Саидмурод Раҳимов,

ЎзА шарҳловчиси