“Yonhap” xabar berishicha, Muan xalqaro aeroportida yuzaga kelgan yo‘lovchi samolyoti halokatidan bir kun o‘tib, “Jeju Air” kompaniyasining xuddi shu rusumdagi yana bir samolyoti shassi - ko‘tarilish va qo‘nish uchun zarur tizim bilan bog‘liq muammo tufayli yo‘ldan qaytdi.

30 dekabr kuni soat 06:37 da Kimpo aeroportidan Boeing B737-800 uchog‘ida samoga ko‘tarilgan 7C101 reysi ekipaji parvoz davomida nosozlikni aniqladi. Aviakompaniya darhol salondagi 161 yo‘lovchini muammodan xabardor qildi va samolyotni ortga burib, 07:25 da xavfsiz qo‘ndirdi.

“Jeju Air” boshqaruv departamenti rahbari Son Kyong Xun so‘zlariga ko‘ra, nosozlik aniqlangach, havo kemasi kapitani shunday qaror qabul qilgan. Shassi tekshirilib, me’yoriga keltirilgan bo‘lsa-da, sardor xavfsizlikni ta’minlash maqsadida qaytishni ma’qul ko‘rgan.

Shundan so‘ng 21 yo‘lovchi ayni reysda uchishdan bosh tortdi. Qolganlar boshqa shu rusumli uchoqqa o‘tkazildi va samolyot 08:30 da Chejuga qayta yo‘l oldi.