АҚШ пойтахти Вашингтонда футбол бўйича 2026 йилги Жаҳон чемпионати учун ўтказилган қуръа натижалари мураббийларда мухлису мутахассисларда турфа фикрларни келтириб чиқарди.

Қуръа натижасига кўра, қайсидир гуруҳ омадли, қай бири энг ғалвали, яна бошқаси туманли кўринишни олган вазиятда Португали, Колумбия, Ўзбекистон ва келаси йил март ойида ўтадиган плей-офф ўйини орқали омадлиси жой оладиган Конго/Ямайка/Янги Каледония футбол жамоаларини жамлаган “К” гуруҳи биз учун омадли-омадсизлиги тўғрисида кўпчилик башорат қилаётган паллада айтиш керакки, барчасига гуруҳ ўйинлари якунида гувоҳ бўламиз.

Жаҳон чемпионати ўз номи билан катта мусобақа. Бу жойда кучсизлар бўлмаслиги тайин. Йўлга чиққан инсон манзилга етишни орзу қилганидек, чемпионат чиптасини нақд қилган жамоа борки, муваффақиятга эришиш умидида режаларни белгилайди.

Португалия терма жамоаси бош мураббийи Роберто Мартинес қуръа натижалари ҳақида фикр билдириб, гуруҳдан мамнунлигини, ЖЧ-2026 га тайёргарликни бошлаш фурсати келганлигини, Колумбия ва Ўзбекистон жиддий рақобатчи жамоалар эканлигини таъкидлаган бўлса, миллий терма жамоамиз сардори Элдор Шомуродов “К” гуруҳдан кейинги босқичга чиқиш имкониятимиз етарли эканлигини, қуръада ҳар нарса бўлиши мумкинлигини айтиб ўтган.

Яна бир қизиқ ҳолат. ЖЧ-2026 қуръа натижалари бир қатор миллий терма жамоалар ўртасидаги ўртоқлик ўйинлари сингари футбол ассоциациялари келишувига кўра, Ўзбекистон ва Португалия миллий терма жамоаларининг келгуси йил март ойида режалаштирилган ўртоқлик ўйини ўтказилиши масаласини ҳам йўққа чиқарди.

Энди ҳа икки терма жамоа белгиланган ўртоқлик ўйинлари учун янги жамоа қидиришига тўғри келади.

Хўш, аслида ҳам кўпчилик футболчилар, мутахассислар таъкидлагандек “К” гуруҳ биз учун омадлими?

Европанинг энг кучли жамоаларидан бири саналган Португалия ёки жаҳон чемпионатларида олти бор иштирок этган океан орти мамлакати бўлган Колумбия билан битта квартетда эканлигимиз, гуруҳдан 2 та жамоа кейинги босқичга чиқишини назарда тутсак, Ўзбекистон терма жамоасининг омадли гуруҳдалиги сўзсиз ҳар бир учрашувда натижага эришишида намоён бўлади.

Рақибларимиз ҳақида сўз юритадиган бўлсак, Жанубий Америка қитъасида жойлашган Колумбия давлати ФИФА рейтингида жорий йил июль ойи ҳолатида 14-ўринда қайд этилган. Мамлакат ФИФА рейтингида энг яхши кўрсаткич - 3-ўринга 2013 йил июль—август ойларида, 2014 йил сентябрь ойида, 2015 йил мартида, 2016 июнь—август ойларида эришган. Колумбия терма жамоаси 1962 йилдан жаҳон чемпионатида иштирок этиб келади.  

2024 йили Бразилияда ўтган жаҳон чемпионати Жанубий Америка қитъаси вакиллари учун ҳар жиҳатдан омадли келган.

Жанубий Америка қитъаси вакиллари 20-жаҳон чемпионатининг “С” гуруҳида Греция, Кот-дъИвуар, Япония терма жамоаларини мағлуб этиб, 9 очко билан кейинги босқичга йўл олган ва 1/8 финалда Уругвайни мағлуб этган, 1/4 финалда эса Бразилия терма жамоасига 1:2 кўринишида мағлуб бўлган.

2001 йили Америка кубогида чемпионликка, 2024 йили кумуш медалга эга чиққан Колумбия терма жамоасига 2022 йилдан бери Нестор Габриэль Лоренсо бош мураббийлик қилиб келмоқда.

Бир неча йиллар Аргентина терма жамоасида футболчи сифатида ҳаракатланган, кейинчалик Европа ва Америка қитъасидаги қатор клубларда мураббий сифатида фаолият олиб борган 59 ёшли Лоренсо 2012—2019 йиллар давомида ҳам Колумия терма жамоасида мураббийлик қилган.

“К” гуруҳининг етакчи жамоаси ҳисобланаётган Португалия жаҳон чемпионатларида тўққиз марта қатнашган. 1966 йили бронза медалига сазовор бўлган, Жамоа бир марта Европа чемпионлигига, бир марта кумуш медалга, уч марта бронза медалларига эгалик қилган. 

Икки марта УЕФА кубогини ватанига олиб келган Португалия терма жамоасида 2023 йилдан бери  Роберто Мартинес бош мураббий сифатида иш олиб бормоқда. Ушбу мутахассис 2016—2022 йиллар давомида Белгия терма жамоасида бош мураббийлик қилган.

Кўриниб турибдики, кўпчилик наздида Ўзбекистон терма жамоасининг “К” гуруҳидаги асосий рақиблари саналган Португалия ва Колумбия футбол жамоалари биз ўйлаганимиздек, у қадар “юмшоқ” эмас. Катта футбол карвонида узоқ йўлни босиб ўтган бу жамоалардан Ўзбекистон терма жамоаси аъзолари фақат профессионаллик, қатъият, совуққонлик ҳисобига устунликка эришиши мумкин бўлади. Ҳали гуруҳдан жой олиш йўлида плей-офф “бекати”да битта ўрин учун навбатда турган Конго бўладими, Ямайками, Янги Каледониями, ҳеч бири яшил майдоннинг “совғаси” бўлмаслиги кундек равшан. 

Демак, жаҳон чемпионатининг шов-шувларга, ҳис-ҳаяжонларга тўла янги даври, янгича мулоҳазалари, ўртоқлик ўйинлари, фикру-мулоҳазалари даври нафақат биз, балки дунёдаги миллионлаб мухлису-мутахассислари учун бошланди. 

Тўлқин Рўзиев, ЎзА