Ҳар ҳафтанинг сешанба оқшомида дунёнинг энг кучли гроссмейстерлари иштирокида ўтказиладиган “Titled Tuesday” онлайн блиц турнирида Жавоҳир Синдоров ғолибликка эришди.

Расмий шахмат унвонига эга “ақл гимнастикаси” соҳиблари иштирокида швейцарча тизимда ўтказилган турнирда ҳамюртимиз Жавоҳир Синдоров 9,5 очко жамғарди ва қўшимча кўрсаткичларга кўра турнир ғолиблигини қўлга киритди.

Жавоҳир сингари 9,5 очко тўплаган грузиялик Дмитрий Андрейкин ва франциялик Максим Вашье-Лаграв кучли учликни банд этди.

Айтиш лозим, Жавоҳир Синдоров бу йил учинчи маротаба ушбу турнир ғолибига айланди. У бир ой аввал ҳам 9,5 очко жамғариб, чемпионликка эришган эди.

Т.Рўзиев, ЎзА