Ҳиндистонда шахмат бўйича давом этаётган жаҳон кубогининг ярим финал ўйинлари ортда қолди. Дунёнинг энг кучли шахматчилари иштирокида ўтаётган ФИДЕ тизимидаги энг нуфузли мусобақалардан бири –жаҳон кубоги ярим финалида икки нафар шахматчимизнинг рўбарў келганини, Жавоҳир Синдоровнинг номзодлар турнири йўлланмасига эга чиққанини Ўзбекистон шахмат ҳаракатининг янги ғалабаси, дейиш мумкин.

Ярим финал ўйинлари якунида Ж.Синдоров мусобақаларни бевосита кузатиб бораётган чет эллик журналистларнинг саволларига жавоб берди.

— Сиз нафақат ФИДE жаҳон кубоги финалига, балки Номзодлар турнирига ҳам йўлланма олдингиз. Ҳозир ўзингизни қандай ҳис қиляпсиз?

— Жуда хурсандман, лекин дўстим(Ёқуббоев) учун бироз хафаман. Биз жуда яхши курашдик. Тай-брекдаги икки рапид партияда ҳам тайёргарлигим анча яхши эди, шунинг учун яхши позициялар олдим, деб ўйлайман. Классик ўйинда у жуда мустаҳкам, яхши тайёрланган. Агар испанча, италянча ёки бошқа дебютни танласам, бу ўйинда юта оламанми ёки қизиқарли позиция чиқадими, аниқ билмасдим. Шунинг учун тезроқ дурангга эришиш ва ҳаммасини рапид ҳамда блицда ҳал қилиш варианти менга маъқулроқ туюлди. Чунки, бу вақт назоратларида ўзимни бироз яхшироқ ҳис қиламан. Лекин барибир Нодирбек ҳам бу ерда ўз даражасини кўрсатди. Жуда яхши ўйнади. Мен озгина омадим келганини ҳам ҳис қиляпман. Номзодлар турнирига йўлланма олганимдан жуда бахтиёрман. Бу менинг бу йилги энг катта мақсадим эди. Энди кейинги турнирларимда Номзодлар турнири учун тайёргарликни бошлайман.

– Тай-брекни ютгандан кейин финал олдидан ўзингизни қанчалик ишончли ҳис қиляпсиз?

– Вей И билан кўп мусобақаларда дуч келганман. Унга қарши қўлимдан келганича яхши шахмат ўйнашга ҳаракат қиламан.  

– Мусобақани яқинларингиз ҳам кузатиб боряптими?

– Оиламиз аъзолари шу ерда. Бобом, бувим ҳам келишган. Жуда хурсандман, бундай пайтда яқинларим ёнимда бўлгани менга катта куч беради. Финалда энг яхши ўйинимни кўрсатишга ҳаракат қиламан.

Т.Рўзиев тайёрлади, ЎзА