Бугун юртимиздаги 10 мингдан ортиқ мактабларда “Биринчи қўнғироқ” садолари жаранглаб, янги ўқув йилига старт берилди. Биринчи синфга илк қадам қўяётган болажонлар катта ҳаяжон билан ота-оналари ҳамроҳлигида мактаб остонасига кириб келишди.

Пойтахтимизнинг Юнусобод туманида жойлашган Миллий гвардияга бириктирилган 58-Жасорат мактабида ҳам “Биринчи қўнғироқ” тадбири ўтказилди. Ўқувчилар мактаб ҳовлисида жам бўлиб, янги ўқув йилини катта шодлик ва қувонч билан қарши олишди. 

Тадбир Давлат мадҳияси билан бошланди. Шундан сўнг ўқувчилар Ватан ҳақида шеърлар ўқишди ва рақс намойиш қилишди. Миллий гвардия ҳарбий оркестри ижроси ҳамда гвардиячиларнинг қўл жанги чиқиши эса болалар қалбида қувонч ва жасорат руҳини уйғотди.

Тантанали тадбирдан кейин барча ўқувчилар ўз синфларига йўл олишди. Илк дарслар “Келажак соати” дарси билан бошланди. Ихтисослаштирилган синфларда эса “Жасорат дарслари” ўтилди. Унда мустақиллик йилларида эришилган ютуқлар ҳақида гапирилди. Шунингдек, хизмат бурчи давомида қаҳрамонлик кўрсатган ҳарбийлар ҳақида ҳам қизиқарли маълумотлар берилди.

Айтиш жоизки, мазкур санада ўтказилган тадбирларда ўқувчилар хавфсизлиги ва жамоат тартибини таъминлашга алоҳида эътибор қаратилди. Миллий гвардия ва ички ишлар органлари ходимлари томонидан мактабларга кириш жойларида ташриф буюрувчилар синчиклаб кўрикдан ўтказилди. Бу эса фарзандларимизнинг тинч ва хавфсиз шароитда таълим олиши учун муҳим омил бўлди.

“Биринчи қўнғироқ” нафақат янги ўқув йили бошланиши, балки ёш авлоднинг маънавий камолоти, Ватанга садоқати ва келажакка ишонч йўлидаги муҳим қадамдир.

<iframe width="650" height="420" src="https://www.youtube.com/embed/a0g06bUoWzI" title="“Jasorat maktabi”da birinchi qo‘ng‘iroq tantanalari" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, ЎзА