Қашқадарёда ички ишлар органлари назоратида турган, ҳаётида қийинчиликларга дуч келган ёшларни ҳарбий-ватанпарварлик руҳида тарбиялаш ҳамда уларни касб-ҳунарга йўналтиришга қаратилган “Жасорат мактаби” лойиҳасининг 2025 йилдаги IV мавсуми якунланди.

Жорий йил 3 декабрь куни Қарши шаҳридаги Ёшлар марказида лойиҳанинг навбатдаги мавсуми бошланиб, унда вилоятнинг барча шаҳар ва туманларидан 122 нафар ёш иштирок этди. Иштирокчилар Жануби-ғарбий махсус ҳарбий округга қарашли Муборак туманидаги ҳарбий қисмга жойлаштирилди.

Лойиҳа доирасида ёшлар 15 дан ортиқ касб-ҳунар бўйича таълим олиб, тадбиркорлик, IT, автосервис ва дурадгорлик йўналишларида амалий машғулотларда қатнашди. Шунингдек, ҳарбий тайёргарлик, спорт мусобақалари ҳамда маънавий-маърифий тадбирлар ташкил этилди.

Лойиҳанинг ёпилиш маросимида қатор раҳбарлар иштирокида “Раҳбар ва ёшлар” учрашуви ўтказилиб, ёшларга яратилаётган имкониятлар ҳамда қўллаб-қувватлаш чоралари юзасидан атрофлича маълумот берилди.

[gallery-26719]

Ўн кунлик ўқув-машғулотларни муваффақиятли якунлаган иштирокчиларга сертификатлар, танлов ғолибларига эса диплом ва эсдалик совғалари топширилди.

Ўлмас Баротов, Жамшид Норқобилов (сурат), ЎзА