Өзбекстанда жасанды интеллект көмегімен күшті жер сілкіністерін орта және ұзақ мерзімге болжау тәжірибесі жолға қойылады.

Осыған орай 2025 жылдың 20 қазанында «Сейсмикалық қауіпсіздікті қамтамасыз ету және сейсмология саласындағы жұмыстардың тиімділігін арттыру жөніндегі қосымша шаралар туралы» Президент жарлығы қабылданды.

Жарлыққа сәйкес, мәдени мұра нысандары мен көлік инфрақұрылымдарының сейсмотұрақтылығын бақылау жүйесін құру, сейсмикалық қауіпсіздік саласын цифрландыру және оған жасанды интеллект технологияларын енгізу, құрылыс алаңдарының топырақ қабатын зерттеу және олардың беріктігін арттыру шараларын қабылдау негізгі бағыттар ретінде белгіленді.

Құжатқа сай, 2026 жылдың 1 қаңтарынан бастап республикадағы «A-373» және «M-39» автомобиль жолдарында, сондай-ақ оларға жалғас тау бөктеріндегі теміржолдарда көшкін қаупі жоғары аймақтарды тұрақты радиолокациялық ғарыштық мониторинг жүйесі ұйымдастырылады.

Жасанды интеллект көмегімен сейсмикалық қаупі жоғары өңірлерде күшті жер сілкіністерін орта және ұзақ мерзімге болжау тәжірибесі енгізіледі.

Бастапқы кезеңде мұндай болжау жүйесі Ташкент қаласы үлгісінде орындалады.

2026 жылдың 1 наурызынан бастап ғимараттар мен құрылыстардың сейсмотұрақтылыққа қатысты техникалық жай-күйі жасанды интеллект арқылы талданатын болады.