Олий ва ўрта махсус таълим вазирининг биринчи ўринбосари К.Каримов ҳамда Жанубий Урал давлат университети ректори A.Вагнер ўртасида учрашув бўлиб ўтди.

Олий ва ўрта махсус таълим вазирлиги Ахборот хизматига кўра, учрашувда томонлар Ўзбекистон ва Россия олий таълим муассасалари ўртасида олиб борилаётган ҳамкорлик алоқалари кўламини юқори баҳолаган ҳолда юртимизнинг бир қатор олий таълим муассасалари ва мазкур университет билан алоқаларни кенгайтириш юзасидан фикр алмашдилар.

Айтиш керакки, Жанубий Урал давлат университети – Россия Федерациясининг Челябинск вилоятида фаолият юритаётган 16 та олийгоҳлари орасидаги энг йирик таълим муассасаси, шунингдек, у кўп маданиятли ва кўп миллатли Smart-университет ҳисобланади.

Университет 1943 йилда ташкил этилган бўлиб, бугунги кунда дунёнинг 50 дан ортиқ давлатидан 30 мингдан ортиқ талаба таълим олмоқда.

– Ўзбекистон ва Россия ректорлари конференцияси, Таълим форуми каби йирик тадбирлар икки мамлакат олий таълими вакиллари ўртасида ўзаро мулоқот учун самарали платформа бўлиб хизмат қилмоқда, – деди Ўзбекистон Республикасида олий ва ўрта махсус таълим вазирининг биринчи ўринбосари К.Каримов. – Жанубий Урал давлат университетини ҳам ушбу тадбирларда фаол иштирок етишга таклиф қиламиз.

2018 йилда бўлиб ўтган биринчи Ўзбекистон ва Россия ректорлари конференциясидаги иштирокини мамнуният билан эътироф этаркан, Жанубий Урал давлат университети ректори A.Вагнер республикамиз олий таълим муассасалари билан ҳамкорлик учун қатор манфаатли йўналишларни санаб ўтди. Шу билан бирга, ректор ўзи раҳбарлик қилаётган ОТМ томонидан ташкил этиладиган халқаро «Звезда» фанлар олимпиадасида Ўзбекистон академик лицей ўқувчиларини қатнашишга таклиф этди.

Шунингдек, учрашувда Жанубий Урал давлат университети ва Тошкент давлат техника университети ўртасида қўшма таълим дастурларини йўлга қўйиш, профессор-ўқитувчилар малакасини ошириш бўйича ҳамкорликни кучайтириш масалаларига эътибор қаратилди.

ТДТУ талабаларининг ушбу хорижий олий таълим муассасалари магистратурасида таҳсил олиши учун грант ўринларини ажратиш, илмий кенгашларда диссертациялар ҳимояси ва икки ОТМ илмий журналларида мақолалар чоп этиш каби йўналишлардаги ишларни янада жадаллаштиришга келишилди.

Н.Усмонова,ЎзА