Жанубий Кореяда собиқ президент Юн Сок Ёлга нисбатан жиноий иш бўйича суд жараёни давом этмоқда. Мамлакат махсус прокурори уни одил судловга тўсқинлик қилганликда айблаб, 10 йил озодликдан маҳрум этиш жазосини талаб қилди. DW тарқатган хабарга кўра, бу жазо Юнга қарши очилган тўртта ишдан фақат биттаси доирасида сўралмоқда.

Айбловга кўра, Юн Сок Ёл 2025 йил январь ойида ҳибсга олиш пайтида терговчиларни чалғитиш мақсадида президент қароргоҳига беркиниб олган. Шунингдек, у ҳарбий ҳолат жорий этиш режасини муҳокама қилишда айрим вазирларни йиғилишга чақирмаган, бу эса уларнинг ҳуқуқлари бузилишига олиб келган.  

Прокуратура собиқ президентни хорижий оммавий ахборот воситаларига ёлғон маълумот тарқатганлик ва ҳарбий раҳбарият фойдаланадиган телефонлардан олинган суҳбат ёзувларини йўқ қилганликда ҳам айбламоқда.  

Бундан ташқари, айблов томони Юннинг ҳарбий ҳолат жорий этиш ҳақида сохта фармон тайёрлаб, кейин уни йўқ қилганини маълум қилган.  Прокуратурага кўра, собиқ президент давлат идораларидан шахсий манфаат йўлида фойдаланиб, қонун устуворлигига жиддий путур етказган. Аммо, Юн Сок Ёл  барча айбловларни рад этмоқда.  

Суд мазкур иш бўйича қарорни 2026 йил 16 январь куни чиқариши кутилмоқда. Айни пайтда Юн ҳарбий ҳолат жорий этишга уриниш билан боғлиқ яна учта жиноий иш бўйича ҳам жавобгарликка тортилган. Улардан бири исёнга раҳбарлик қилиш айбловини ўз ичига олади ва бу иш бўйича ҳукм февраль ойида чиқарилиши мумкин.

Шунингдек, махсус прокурорлар Юнни 2024 йил октябрь ойида Шимолий Корея ҳудудига дронлар учиришга буйруқ бериб, бу орқали можаро қўзғатишга уринишда айбламоқда. Тергов талқинига кўра, у шу йўл орқали ҳарбий ҳолат жорий этиш учун баҳона яратишни кўзлаган.  

Эслатиб ўтамиз, 2024 йил декабрь ойида Юн Сок Ёлнинг ҳарбий ҳолат эълон қилиши мамлакатда сиёсий инқирозга сабаб бўлган. Парламент бу қарорни рад этган, ортидан собиқ президентга импичмент эълон қилинган. Конституциявий суд 2025 йил апрель ойида импичментни тасдиқлаган. Шундан бери Юн бир неча бор ҳибсга олиниб, озод этилган ва кейин яна қайта ҳибсга олинган.                              

<iframe width="650" height="420" src="https://www.youtube.com/embed/kOF6FZVgYPM" title="Janubiy Koreyaning sobiq prezidentiga 10 yil qamoq jazosi so‘raldi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов, ЎзА