Корея Республикаси Президенти Юн Сок Ёлнинг баёнот беришича, КХДР ядро қуролига эга бўлишга уринаётган экан, бу мамлакатга молиявий ёки иқтисодий ёрдам бермаслик керак, деб ёзмоқда Yonhap агентлиги президент офиси берган маълумотга таяниб.

“Пул беришни тўхтатиш керак, Шимолий Корея ядро дастурини давом эттирар экан, бир чақа ҳам ололмаслигини тушинсин”, - деган Юн Сок Ёл. Агентликнинг аниқлик киритишича, у икки мамлакатни бирлаштириш бўйича вазирликка шундай кўрсатма берган.  

Президент маъмуриятининг маълум қилишича, Юн Сок Ёлнинг изоҳи гуманитар ёрдамга тегишли эмас.  

“Бирлаштириш вазирлиги ҳозиргача бир неча бор гуманитар ёрдам тамойили ўзгармасдан қолишини маълум қилган”, - деган президент офиси вакили.  

Душанба куни Корея Марказий телеграф агентлиги КХДР етакчиси Ким Чен Ин ядро қуролини яратиш учун зарур бўлган ядро материалларини ишлаб чиқаришни кучайтиришга кўрсатма берди, деб хабар тарқатган эди.