Жанубий Кореянинг Улсан шаҳридаги «Шин-Кори» АЭСи турбиналарининг бири ёнғин содир бўлгани боис тўхтатилди, деб хабар тарқатди Ренхап агентлиги мамлакат ядровий хавфсизлик бўйича комиссия (NSSC) берган маълумотга таяниб.

Агентликнинг хабарига кўра, ёнғин «Шин-Кори» АЭСнинг тўртинчи реакторида содир бўлган. Орадан бир соатлар ўтгандан кейин ёнғин ўчирилган. Ҳукумат ёнғин турбинадан келиб чиққан, деб гумон қилмоқда.

Хабарда таъкидланишича, комиссия ёнғиннинг аниқ сабабини билиш учун АЭСга ўзининг терговчиларини жўнатади. Ҳозирча қурбонлар ёки ҳавода радиация тарқалгани ҳақда хабар берилмади, электростанция атрофида радиация миқдори мумкин бўлган меъёрдан ошмаган.

Ёнғин чиққан реакторнинг қуввати 1,4 миллион киловаттга тенг, ушбу реактордан тижорий фойдаланиш 2019 йилдан бошланган, дейилади хабарда.