Чин юрти сув ости археологлари Мин сулоласи даврида Жанубий Хитой денгизи тубига чўкиб кетган икки савдо кемасига тегишли 900 дан ортиқ артефактни топди.

Маданий мерос миллий бошқармаси расмий баёнотида айтилишича, 2022 йил октябрь ойида шимоли-ғарбий қитъа ён бағрида, тахминан 1500 метр чуқурликда ётган икки қадимий кема аниқланган. Мутахассислар фикрича, кемалар 1368-1644 йиллар оралиғида ҳукмронлик қилган Мин сулоласининг турли даврларига тааллуқли. 

Уч босқичда ишлаган тадқиқотчилар биринчи идишдан 890 буюм, жумладан мис танга, кулолчилик ва чинни буюмлар топди. Тахминга кўра, чўккан кемалардан бири Цзиндэжэня шаҳридан чинни олиб кетаётган экан. 

Иккинчи кемадан 38 объект, жумладан Ҳинд океани чиғаноғи, шох, чинни, кулолчилик ашёси ва қора дарахт ёғочи топилди. 

Кўп буюмлар Мин сулоласининг 1505-1521 йилларга дахлдор Чжэндэ даврига тўғри келади. Aйрим топилмалар ёши каттароқ, яъни 1487-1505 йиллар ҳукмронлик қилган Хунжи императорига тегишли бўлиши ҳам мумкин. 

Aрхеологлар денгиз тубидан артефакт ва чўкинди намунасини йиғиш учун бошқариладиган ва учувчисиз сув ости кемаларидан фойдаланган. Шунингдек, сув остида юқори аниқликда ишлайдиган камералар ва 3D лазерли сканер ёрдамида ҳалокат жойи ҳам ҳужжатлаштирилди. 

Г.Сатторова, ЎзА