Surxondaryo viloyatida ham 2023/2024-o‘quv yili uchun bakalavriat ta’lim yo‘nalishlariga kirish test sinovlari bo‘lib o‘tmoqda.

Test sinovlari o‘tkazilayotgan binolarda  abituriyentlar va ularning ota-onalari uchun barcha sharoitlarni yaratishga viloyatdagi oltita oliy talim muassasasi puxta hozirlik ko‘rdi. Ota-onalar uchun test jarayonlarining ochiq, shaffof o‘tishini onlayn kuzatish uchun maxsus zallar tashkil etilib, jihozlandi.  

Termiz olimpiya va paralimpiya sport turlariga tayyorlash markazidagi 840 o‘rinli uchta binoda Termiz davlat universitetiga hujjat topshirgan abituriyentlar o‘z bilimlarini sinovdan o‘tkazmoqda. Vohadagi eng yirik oliy talim muassasasi rektori Avazjon Maraximov bugun ham mas’ul xodimlar bilan test sinovlari o‘tkazilayotgan joyga kelib, abituriyentlarning test savollarini to‘g‘ri yechishiga omad tiladi. Ota-onalar uchun kuzatish zallarida yaratilgan sharoitlarni ko‘zdan kechirib, ular bilan dildan suhbatlashdi. Yosh avlodning yetuk mutaxassis bo‘lib kamolga yetishida ta’lim va tarbiyaning o‘rni haqida atroflicha fikr almashdi.  

Termiz davlat universitetiga hujjat topshirgan abituriyentlarning ota-onalari uchun Termiz olimpiya va paralimpiya sport turlariga tayyorlash markaziga yaqin Ro‘zi Choriyev nomidagi san’at maktabida kutish-kuzatish zallari tashkil etilgan. Barcha qulayliklarga ega salqin, keng,  shinam maxsus zallarda abituriyentlarning yaqinlari test jarayonlarini onlayn kuzatmoqda.  

– O‘g‘lim bugun test topshirmoqda, – deydi Jarqo‘rg‘on tumanidan kelgan Nasiba Imomova. – Men farzandim va boshqa yigit-qizlarning savollarni qanday yechayotganini kutish zalida onlayn kuzatib turibman. Sharoitlardan juda xursandman. Oldinlari bunday imkoniyatlar yo‘q edi. Farzandlarimizni issiqda kutib turardik. Endilikda salqin xonalarda kutib, kuzatib o‘tiribmiz. Buning uchun inson qadrini ulug‘layotgan davlatimizdan, barcha mutasaddilardan minnatdormiz. Har bir yoshning o‘zi sevgan kasb bo‘yicha o‘qib, Vatanimizga munosib mutaxassis bo‘lishiga omad tilayman.  

Termiz davlat universitetidan olingan malumotlarga ko‘ra, har kuni ikki smenada bo‘lib o‘tayotgan test sinovlari joriy yilning 14 avgustigacha davom etadi.  

Xolmo‘min Mamatrayimov, O‘zA