Буюк Британия пойтахти Лондонда жамоалар ўртасида ўтаётган навбатдаги жаҳон чемпионатининг иккинчи кунги мусобақалари ортда қолди.

Кеча ўтказилган 5-8-тур ўйинларидаги натижалар ва бир кун муқаддам ўтган 4 та тур ўйинлари ҳолатида олтита ўйинда ғалаба, битта дуранг, битта мағлубият билан 13 очкодан жамғарган Арджун Эригайси етакчилигидаги “MGD1” ҳамда Леван Аронян сардорлигидаги “Hexamind” жамоалари 52 та жамоа орасида етакчилик қилмоқда.  

Уларни тақиб этаётган “Freedom” “Uzbekistan” ва “Germany и Friends” жамоалари ҳисобида 12 очко мавжуд.  

Бевосита Нодирбек Абдусатторов, Жавоҳир Синдоров, Рустам Қосимжонов, Нодирбек Ёқуббоев, Гулруҳбегим Тоҳиржонова, Нилуфар Имомқўзиева, Афрўза Ҳамдамова, Шамсиддин Воҳидовдан иборат “Uzbekistan” жамоасининг ортда қолган баҳслардаги натижаларига тўхталадиган бўлсак, ҳамюртларимиз 8 та тур якунига кўра, 5 та ғалаба, 2 та дуранг, 1 та мағлубият эвазига 4-ўринни эгаллаб турибди. 

Бугун, 13 июнь куни 9-12-тур ўйинлари бўлиб ўтади. Шахматчиларимиз 9-турда “Germany and Friends” жамоаси билан баҳсга киришади.  

Айтиш лозим, мукофот жамғармаси 500 минг евродан иборат жаҳон чемпионати дастурига биноан бугун рапид мусобақаларининг ғолиб ва совриндорлари аниқланади. 14-15 июль кунлари эса икки босқичли блиц мусобақалари ташкил этилади.  

Т.Рўзиев, ЎзА