Жиззах вилоятининг Дўстлик туманида ипакчиликка бўлган ёндашув янги мазмун касб этмоқда. Айниқса, 2026 йил — “Маҳаллани ривожлантириш ва жамиятни юксалтириш йили” доирасида амалга оширилаётган ташаббуслар маҳалла ҳаётида аниқ ва амалий натижалар билан намоён бўлмоқда.

“Саритепа” маҳалла фуқаролар йиғинида замонавий талаблар асосида барпо этилган янги пиллахонанинг ишга туширилиши ҳам бунинг яққол тасдиғидир.

Маълумки, ипакчилик — Ўзбекистон қишлоқ хўжалигида анъанавий ва стратегик аҳамиятга эга соҳалардан бири. Сўнгги йилларда бу йўналишда қўшимча қиймат яратиш, хом ашёни қайта ишлаш ва аҳоли бандлигини таъминлашга қаратилган ислоҳотлар изчил амалга оширилмоқда. “Саритепа” МФЙ да фойдаланишга топширилган пиллахона ҳам ана шу кенг қамровли жараённинг маҳалла даражасидаги амалий ифодаси сифатида эътиборга молик.

Мазкур пиллахонада 200 қути ипак қурти боқиш режалаштирилган. Бу эса ҳудудда пилла етиштириш ҳажмини ошириш, ипак хом ашёси билан таъминлаш занжирини мустаҳкамлашга хизмат қилади. Мутахассислар таъкидлаганидек, пиллачиликда ҳар бир қўшимча қувват — ишлаб чиқариш барқарорлиги ва экспорт салоҳиятини ошириш демакдир.

Лойиҳанинг яна бир муҳим жиҳати — унинг ижтимоий самарасида намоён бўлмоқда. Пиллахона фаолияти натижасида маҳаллада 50 та янги иш ўрни яратилмоқда. Бу, айниқса, қишлоқ ҳудудлари учун долзарб масала — аҳолини доимий иш билан таъминлаш, оилалар даромадини ошириш ҳамда иш излаб четга чиқишга эҳтиёжни камайтиришга хизмат қилади. Бу жиҳатдан лойиҳа 2026 йилда белгиланган устувор мақсадлар — маҳаллани ривожлантириш ва жамият барқарорлигини мустаҳкамлаш ғояси билан ҳамоҳангдир.

Шу билан бирга, пиллахонанинг ишга туширилиши аҳолини меҳнатга жалб этиш, касб-ҳунарга йўналтириш ҳамда ёшларда ишлаб чиқариш маданиятини шакллантиришга ҳам туртки бўлмоқда. Амалиёт шуни кўрсатадики, маҳалла даражасида ташкил этилган бундай ташаббуслар жамиятни юксалтиришнинг энг самарали йўлларидан бири ҳисобланади.

Мутахассислар фикрича, келгусида бундай пиллахоналар сонини кўпайтириш орқали Дўстлик туманида ипакчиликни тўлиқ кластер тамойили асосида ривожлантириш мумкин. Бу эса хом ашёдан тайёр маҳсулотгача бўлган занжирни маҳаллий даражада шакллантириш имконини беради.

Хулоса қилиб айтганда, “Саритепа” маҳалласида ишга туширилган пиллахона — бу шунчаки янги ишлаб чиқариш объекти эмас. У 2026 йилда илгари сурилаётган маҳалланинг иқтисодий қудратини ошириш, аҳоли бандлигини таъминлаш ва жамиятни юксалтириш мақсадларига хизмат қиладиган муҳим ташаббусдир.

Абдужалол Қаюмов, ЎзА мухбири