O‘zbekiston fermer, dehqon xo‘jaliklari va tomorqa yer egalari Kengashi huzuridagi Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasi faoliyati sarhisobiga bag‘ishlangan anjuman bo‘lib o‘tdi.

Tadbirda aholining turmush farovonligini oshirish, kambag‘allikni qisqartirishda yerdan unumli foydalanish muhim ahamiyat kasb etishi qayd etildi. Shu boisdan mamlakatimizda dehqon xo‘jaliklari va tomorqa yer egalarining yer uchastkalaridan maqsadli va samarali foydalanishi, yerni tayyorlash, urug‘, ko‘chat va daraxtlar ekish, issiqxonalar qurish, chorva va parrandalarni ko‘paytirish orqali aholi daromadini oshirishga alohida e’tibor qaratilmoqda. Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasi bu borada tizimli ishlar amalga oshirmoqda.

Jamg‘arma tomonidan fermer, dehqon xo‘jaliklari va tomorqa yer egalari faoliyatini rivojlantirish, kredit resurslaridan foydalanishni kengaytirish, ularning innovatsion faoliyatini qo‘llab-quvvatlash, yangi turdagi qishloq xo‘jaligi mahsulotlari yetishtirish rag‘batlantirib kelinmoqda. Aholi tomorqalariga xizmat ko‘rsatadigan «Tomorqa xizmati» MCHJlarni moddiy-texnika bazasini kuchaytirish uchun moliyaviy jihatdan qo‘llab-quvvatlash fermer, dehqon xo‘jaliklari va tomorqa yer egalari, shuningdek, «Tomorqa xizmati» MCHJlarni jamg‘arma mablag‘lari hisobidan qonunchilikda belgilangan tartibda qishloq xo‘jaligi texnikasi, texnologiyalari, asbob-uskunalar hamda tayyor intensiv bog‘ va tokzorlar hamda issiqxonalar bilan ta’minlash bo‘yicha lizing faoliyati amalga oshirilmoqda.

Xususan, joriy yilda jamg‘arma ko‘magida “Tomorqa xizmati” MCHJlar 5,6 milliard so‘m aylanma mablag‘ bilan ta’minlandi, aholi xonadonlariga xizmat ko‘rsatish 50 mingga ortdi. Yiliga 10 ming tonna meva-sabzavot qayta ishlanadi va zaxira qilinadi. Eng muhimi 400 ta yangi ish o‘rinlari yaratiladi.

– Birgina Toshkent viloyatida zamonaviy issiqxonaning qurilish loyihasiga ko‘ra 20 gektar yer maydonida issiqxonalar Xitoy, tonnel va golland usulida qurilishi loyihalashtirilgan, – deydi Jamg‘arma bo‘lim boshlig‘i Xurshid Isroilov. – Hozirgi kunda jami 5 gektar yer maydoni 28ta issiqxonani qurish ishlari yakunlandi. Qurib bitkazilgan issiqxonalarga buyurtmalar asosida lizing shartlari asosida sotilmoqda. Hozirga qadar 16 ta issiqxona lizing shartnomasi asosida sotildi. Shuningdek, 32 ta “Tomorqa xizmati” MCHJ komplekslari orqali yiliga 200 mingdan ortiq aholi xonadonlarga xizmat ko‘rsatish, nobud bo‘lishi ehtimoli yuqori bo‘lgan 30 ming tonna mahsulotni muzlatkich omborlariga zaxira qilish, 50 ming gektar tomorqa maydonini ekish ishlari uchun arzon narxlarda haydab berish, 90 ming tonna meva sabzavotni mahsulotlarini qayta ishlash va har bir klaster loyihasi orqali 600 ming AQSH dollar miqdorida eksportni amalga oshirish rejalashtirilmoqda.

Sohada shaffoflikni ta’minlash, korrupsiyaning olini olish, unga qarshi kurashishning samarali tizimini yaratish borasida ham jamg‘arma bir qator amaliy ishlarni qilmoqda. Bu esa jamg‘arma mablag‘larining samarali va manzilli ishlatilishiga, korrupsiyaga qarshi kurashishda qonun hujjatlarini talab darajasida takomillashtirishga, xodimlar va mijozlarning huquqiy ongi va huquqiy madaniyatini yuksaltirishga xizmat qiladi.

Tadbir davomida O‘zbekiston fermer, dehqon xo‘jaliklari va tomorqa yer egalari Kengashi huzuridagi Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasiga Xalqaro standartlar ISO 9001:2015 “Sifat Menejmenti Tizimi”, ISO 37001:2016 “Korrupsiyaga qarshi kurashish menejment (pora olish-berish bilan kurashish) tizimi” xalqaro standartlar bo‘yicha sertifikatlari topshirildi.

Tadbirda jamg‘armaning 2021 yilning o‘tgan davri mobaynida fermer, dehqon va tomorqa yer egalarini qo‘llab-quvvatlashga yo‘naltirilgan moliyaviy resurslar va ularning natijalari xususida to‘liq ma’lumot berildi.

Go‘zal Sattorova, O‘zA